ئەمریکا 1700 بۆمبی بە ئیسڕائیل بەخشی کە کێشی هەر دانەیەک نیو تەنە

SNN

ئەمڕۆ دووشەممە، ڕۆژنامەی ئیسرائیل ھیوم لە زاری سەرچاوە سەربازییە باڵاکانی وڵاتەکەیەوە بڵاویکردووەتەوە، دوای ماوەیەکی زۆر لە گفتوگۆ و دانوستان و ھاوکات لەگەڵ ھەڕەشەکانی ئیسرائیل بۆ ھێرشکردنە سەر لوبنان و زیادبوونی گرژی و ئاڵۆزییەکانی نێوان تاران و تەلئەبیب، ئەمریکا ڕەزامەندی لەسەر ڕەوانەکردنی کاروانێکی چەک بۆ ئیسرائیل دەبڕیووە کە کاروانەکە لە 1700 بۆمب پێکدێت و کێشی ھەر بۆمبێکیش نیو تۆنە، بۆمبەکانی ئەمریکا کە بۆ ئیسڕائیلی ناردوون تایبەتە بە خاپورکردن و هەڵتەکاندنی ژێرخان و تونێک و ئەو شوێنانەی کە لەژێر زەویدا بۆ حەشاردان بەکاردێت.

ئاماژەی بەوەشکردووە، ئیسرائیل ھەوڵی داوە ئەمریکا بۆمبی MARK-83ی پێبدات لەو جۆرەی کە کێشی ھەر بۆمبێک یەک تۆنە، بەڵام ئەمریکا بەوە ڕازی نەبووە و بڕیاریداوە کاروانێکی ھەمان ئەو بۆمبەی بۆ ڕەوانە بکات، بەڵام لەو جۆرەی کێشی ھەر بۆمبێک نیو تۆنە لە جۆری MARK-82.