لەبارەی مووچەی مانگی حەوتەوە زانیاریی نوێ ئاشکرا بوو
SNN
ئەندامێکی ئەنجوومەنی نوێنەرانی عێراق رایدەگەیەنێت، هێشتا بەغدا وردبینیکردنی بۆ لیستی مووچەی مانگی تەمموز تەواو نەکردووە، دەڵێت “چارەسەری یەکجاری لیستەکانی مووچە تەوتینە”.
سۆران عومەر، ئەندامی ئەنجوومەنی نوێنەرانی عێراق لە بارەی پرسی مووچەی مانگی حەوتەوە رایدەگەیەنێت، تاکو ئێستا وردبینی وەزارەتی دارایی فیدراڵ بۆ لیستەکانی مووچە بەردەوامە و کۆتایی نەهاتووە.
سەبارەت بە چارەسەری یەکجاری کێشەی لیستی مووچەخۆران، ئەو ئەندامەی ئەنجوومەنی نوێنەرانی عێراق دەڵێت “چارەسەری یەکجاری مووچە و لیستەکان و ئەم دواکەوتنانەی مووچە دابەشکردن تەوتینە، تاکو هەرێم تەوتین نەکات کێشەی مووچە چارەسەر نابێت”.
ئەمە لە کاتێکدایە، لە بەغدا دەست بە دابەشکردنی مووچەی مانگی هەشتی مووچەخۆران کراوە، بەڵام مووچەخۆرانی هەرێم تاکو ئێستا مووچەی مانگی حەوتیان وەرنەگرتووە و روون نییە بەغدا کەی پارەی مووچەخۆران بۆ بانکەکانی هەرێم دەنێرێت.
