توركمان و عه‌ره‌به‌كان پێشنیارێكى مه‌سعود بارزانیان ره‌تكرده‌وه
كۆبوونه‌وه‌ى سه‌رۆكى پارتى له‌گه‌ڵ عه‌ره‌ب و توركمانه‌كان | فۆتۆ: باره‌گاى بارزانى
SNN- عەلی حەمەسەعید
له كۆبوونه‌وه‌ى پارتى دیموكراتى كوردستان و كوتله‌ى عه‌ره‌بى و توركمان سه‌رۆكى پارتى دیموكراتى كوردستان پێشنیارى كردووه كه بۆ ماوه‌ى چوار مانگ پۆستى پارێزگارى كه‌ركوك بدرێت به پارتى، به‌ڵام لایه‌نه عه‌ره‌بى و توركمانه‌كان ره‌تیانكردووه‌ته‌وه.
رۆژى یه‌كشه‌ممه 4ى ئاب، مه‌سعود بارزانى، سه‌رۆكى پارتى دیموكراتى كوردستان له سه‌رى ڕه‌ش پێشوازى كرد له شاندى هاوبه‌شى كوتلەی عەرەبی و توركمانی ئەنجوومەنی پارێزگای كەركوك به‌مه‌به‌ستى گفتوگۆ كردن له‌سه‌ر دۆسیه‌ى پارێزگارى كه‌ركوك.
به‌پێى زانیارییه‌كانى SNN، “له كۆبوونه‌وه‌كه‌دا سه‌رۆكى پارتى دیموكراتى كوردستان پێشنیاری ئەوەی بۆ هەردوولایەنی عەرەبی و توركمان كردووە كە ئامادەن پشتگیری عەرەب و توركمان بكه‌ن بۆ ئەوەی پۆستی پارێزگاری كەركوك وەربگرن بەو مەرجەی تەنها بۆ ماوەی پێنج مانگ پۆستی پارێزگاری كەركوك بدرێت بە كەسێكی پارتی”.
هه‌ر به‌پێى زانیارییه‌كان، “شانده هاوبه‌شه‌كه رازى نه‌بوو بۆ پێشنیاره‌كه‌ى سه‌رۆكى پارتى دیموكراتى كوردستان و ره‌تیانكردووه‌ته‌وه و كۆبوونه‌وه‌كه كۆتایی پێهاتووه”.
داواكارییه‌كه‌ى سه‌رۆكى پارتى دیموكراتى كوردستان له‌كاتێكدایه ئه‌و حزبه ته‌نیا دوو كورسى ئه‌نجوومه‌نى پارێزگاى كه‌ركوك هه‌یه و ده‌یه‌وێت له‌ڕێگه‌ى پێكهێنانى هاوپه‌یمانیه‌تى له‌گه‌ڵ حزب و لایه‌نه‌كانى تر ئه‌و پۆسته وه‌ربگرێت.
