بەرزبوونەوەی نرخی دۆلار و مووچەی فەرمانبەرانی هەرێم تەیف سامی دەباتە پەرلەمان
تەیف سامی، وەزیری دارایی عێراق | فۆتۆ: Iraq Gov
SNN-عەلی حەمە سەعید
ئەندامێكی لیژنەی دارایی لە ئەنجومەنی نوێنەرانی عێراق ئاماژە بەوەدەكات بەمەبەستی گفتوگۆكردن و لەسەر مووچەی فەرمانبەرانی هەرێم و هاوتاكردنی مووچەی خانەنشینان و بەرزبوونەوەی نرخی دۆلار، تەیف سامی بانگهێشتی لیژنەی دارایی پەرلەمانی عێراق دەکرێت
د.جەمال كۆچەر، ئەندامی لیژنەی دارایی لە ئەنجومەنی نوێنەرانی عێراق بەSNN-ی ڕاگەیاند: سبەی چوارشەممە وەک لیژنەی دارایی پەرلەمانی عێراق میوانداریی (تەیف سامی) وەزیری دارایی عێراق دەكەین کە ئامانج لێی گفتوگۆكردنە لەبارەی چەند پرسێكەوە كە گرنگترینیان بریتی دەبێت لە بابەتی دواكەوتنی مووچەی فەرمانبەرانی هەرێمی کوردستان کە مانگانە لەكاتی خۆیدا ڕەوانەناكرێت و هەروەها بابەتی هاوتاكردنی مووچەی خانەنشینان و بەرزبوونەوەی نرخی دۆلاریش تاوتوێ دەكرێت.
ئەو ئەندامەی ئەنجومەنی نوێنەرانی عێراق ئەوەشی خستەڕوو، عێراق كێشەی كەمی سیولەی هەیە ئەوەش بەهۆی ئەوەی ئەمریكا دۆلاری كەمتر لە فرۆشی نەوت رەوانەی عێراق دەكات، ئەوەش كێشەی پارەی كاشی دروستكردووە، هەر ئەوەش پەیوەندی بە بەرزبوونەوەی نرخی دۆلار هەبووە.
