ماڵپەڕێکی ئیسرائیلی وردەکاری کوژرانی هەنییە ئاشکرا دەکات
SNN
هەرچەندە تائێستاش ئیسرائیل بە فەرمی کوشتنی ئیسماعیل هەنییە سەرۆکی مەکتەبی سیاسی حەماس لە تارانی نەگرتووەتە ئەستۆ، بەڵام ماڵپەڕێکی ئەو وڵاتە وردەکانی کوشتنی ئەو سەرکردە فەلستینیە و ئەنجامدەرانی بڵاودەکاتەوە.
بە گوێرەی راپۆرتێکی ماڵپەڕی جوئیش کرونیکل ئیسماعیل هەنییە لە رێگە دانانی بۆمب لە ژێر سیسەمی شوێنی خەوتنەکەیەوە کوژراوە و ئاماژە بەوەدەکات، دوو ئەندامی یەکەی “ئەنسار مەهدی”ی سەر بە سوپای پاسداران کە ئەرکی پارێزگاری لە بیناکە و میوانەکانیان لە ئەستۆ بووە، پێشتر لە لایەن موسادەوە بەکرێگیراون و ئەرکی دانانی بۆمبەکەیان جێبەجێکردووە.
ئەوەشی خستووەتەڕوو، بەگوێرەی دیمەنەکان کە لە کامێرای چاودێرییەوە تۆمارکراون، ئەو دوو کەسە دوای دانانی بۆمبەکە دەستبەجێ بیناکەیان جێهێشتووە و بە ئۆتۆمبێلێکی رەش لەو ناوچەیە دوورکەوتوونەتەوە.
هەروەک ئاشکراشی کردووە، ئەو دوو کەسە هەمان رۆژ “بە هاوکاری موساد لە ئێران چوونەتە دەرەوە ئێستا لە وڵاتێکی باکوری ئەوروپان”.
تائێستا ئێران و ئیسرائیل لەبارەی زانیارییەکانی ئەو ماڵپەڕە هیچ لێدوان و کاردانەوەیەکیان نەبووە.
هەرچی بەرپرسانی ئێرانین باس لەوەدەکەن هەنییە کە بۆ بەشداری لە مەراسیمی دەستبەکاربوونی مەسعود پزیشکیان سەردانی ئێرانی کردبوو، بە مووشەک و لەلایەن ئیسرائیلەوە کوژراوە، بەڵام بەرپرسانی تەلئەبیب تائێستا هیچ لێدوانێکیان لە بارەی بوونی رۆڵی خۆیان لە کوشتنی ئەو بەرپرسەی حەماس رانەگەیاندووە.
