جگە لە پۆستی پارێزگار، SNNئەو پۆستانە ئاشكرا دەكات كە لە حکومەتی خۆجێی كەركوك بەر كورد دەكەوێت
SNN-عەلی حەمە سەعید
دوای ئەوەی پۆستی پارێزگاری كەركوك بۆ فراكسیۆنی یەكێتی نشتیمانی كوردستان یەكلایی بوویەوە و ئەمڕۆش پارێزگار بە فەرمی دەستبەكار بوو، هاوكات لە حكومەتی خۆجێی كەركوك چەندین پۆستی دیكەی ئەمنی و خزمەتگوزاری دیكە بەر كورد دەكەوێت، SNNیش گرنگترین ئەو پۆستانە ئاشكرا دەكات كە بەر كورد دەكەوێت.
بەگوێرەی ئەو زانیارییانەی كە لەبەرپرسێكی شاری كەركوک بە SNNدراوە، بەگوێرەی ئەو ڕێككەوتنەی كە لە نێوان كورد و عەرەب و توركمان كراوە بۆ پێكهێنانی حكومەتی خۆجێی كەركوك جگە لەوەی پۆستی پارێزگار دراوە بە كورد، لەهەمان كاتیشدا چەندین پۆستی دیكەی گرنگ لەبواری ئەمنی و خزمەتگوزاری دەدرێن بە كورد، بەجۆرێك هەندێك لەو پۆستانەی بە كورد دەدرێن پێشتر لای عەرەب و توركمان بوون.
ئاماژەی بەوەشكرد، بەگوێرەی ڕێككەوتنی پێكهێنانی حكومەتی خۆجێی كەركوك پۆستی قائیمقامی دوبز بۆ كورد دەبێت، هاوكات بەڕێوەبەری ناحیەكانی سەرگەڕان، قەرە هەنجیر و شوان لە سنووری كەركوك بەدەستی كوردەوە دەبن، لەگەڵ ئەوانەشدا هەردوو بەڕێوەبەری گشتی پەروەردە و شارەوانی بۆ كورد دەبن؛ هاوكات بەڕێوەبەری لقی كەركوكی كۆمپانیای بەرهەمە نەوتیەكان دەدرێتە كورد.
هەر لە زانیارییەكانی SNNئەوەشهاتووە، ئەو پۆستانەی كە لەباری ئەمنی و سەربازیدان كورد پۆستی گرنگی بەردەكەوێت بەجۆرێك بەڕێوەبەری هەواڵگری سەربازی سوپا لە كەركوك كە سەر بە وەزارەتی بەرگریی عێراقە بۆ كورد دەبێت هاوكات جێگری بەڕێوەبەری گشتی پۆلیسی كەركوك دەدرێتە كورد.
