بەهۆی بەسەربردنی پشووی هاوینە لە ئەوروپا، سەرۆكی حكومەت كۆبوونەوەكانی ئەنجومەنی وەزیرانی پەكخستووە

SNN-عەلی حەمە سەعید

ماوەی پێنج هەفتەیە كۆبوونەوەی ئەنجومەنی وەزیرانی هەرێم بەڕێوەنەچووە لەكاتێكدا تا ئێستا مووچەی مانگی ڕابردووی فەرمانبەران دابەشنەكراوە و هەزران پرۆژە لە سەرجەم شارو شارۆچكەكان ڕاگیراون، ئەوەش بەهۆی گەشتی سەرۆكی حكومەت بۆ دەرەوە و بەشداریكردنی لە ئاهەنگی دەرچوونی كوڕەكەی لە كۆلێژی سەربازی ساندهێرست لە بەریتانیا.

بەگوێرەی بەدواداچوونەكانی SNN ماوەی پێنج هەفتەیە هیچ كۆبوونەوەیەكی ئەنجومەنی وەزیرانی هەرێم بەرێوەنەچووە، لەكاتێكدا تا ئەمڕۆ مووچەی مانگی ڕابردووی فەرمانبەران دابەشنەكراوە و دیاریش نییە كەی دابەشدەكرێت، ئەوەش ئەكری حكومەتی هەرێم بەدواداچوون بۆ ئەو بابەتە بكات و فسار لەحكومەتی عێراقی بكات بۆ خەرجكردنی مووچەی فەرمانبەرانی هەرێم لەكاتی خۆیدا.

ئاماژە بەوەشكراوە، لەسەرجەم شارو شارۆچكەكان هەزاران پرۆژە ڕاگیراون، كە زۆرینەی ئەو پرۆژانەش پێویستییان بە فەرمانی ئەنجومەنی وەزیران هەیە بۆ ئەوەی كاركردن تیایاندا دەستپێبكاتەوە و تەواوبكرێن، بەڵام حكومەتی هەرێم بەسەرۆكایەتی ( مەسروبارزانی) لەوەشدا كەمتەرخەمی كردووە و ئامادە نییە كۆبوونەوەی ئەنجومەنی وەزیران بەڕێوەببات.

هەر لە بەدواداچوونەكانی SNNئەوەشهاتووە كە (مەسرور بارزانی) سەرۆكی حكومەت زیاتر لە مانگێكە بەمەبەستی بەسەربردنی پشوو سەردانی وڵاتانی ئەوروپای كردووە، هەر لەو چوارچێوەیەشدا هەفتەی ڕأبردوو لە وڵاتی بەریتانیا بەشداری لە ئاهەنگی دەرچوونی (ئارین)ی كوڕی كرد لە كۆلێژی سەربازی شاهانەی ساندهێرست لە بەریتانیا و تا ئێستاش دیار نییە كەی سەرۆكی حكومەت دەگەڕێتەوە هەرێم و كۆتایی بە پشووەكانی دەهێنێت.