هەرێم چاوەڕێیە ئەمڕۆ بەغدا مووچەی بۆ بنێرێت

SNN

بڕیارە ئەمڕۆ پێنجشەممە، وەزارەتی دارایی عێراق مووچەی مانگی تەمووزی فەرمانبەرانی هەرێمی کوردستان بنێرێت.

پێشتر هەریەکە خەلیل دۆسکی، ئەندامی لیژنەی دارایی ئەنجومەنی نوێنەران و دکتۆر بڕیار رەشید و دکتۆر نەرمین مەعروف، دوای کۆبوونەوەکەی ڕۆژی سێشەممەیان لەگەڵ وەزیرانی دارایی و نەوت و پلاندانان و پارێزگاری بانکی ناوەندی ڕایگەیاندبوو کە تەیف سامی وەزیری دارایی پێیوتوون ڕۆژی پێنجشەممە مووچەی فەرمانبەرانی هەرێم دەنێرن.

لە کوبوونەوەکەدا وەزیری دارایی عێراق هیچ بەڵێنێکی سەبارەت بە ناردنی مووچەی پێشمەرگە و هێزە ئەمنییەکان نەداوە.

کۆتایی مانگی ڕابردوو وەزارەتی دارایی هەرێمی کوردستان ڕایگەیاند، لیستی مووچەی بۆ وەزارەتی دارایی عێراق ناردووە، بەڵام وا نیوەی مانگی ئاب تێپەڕدەبێت و هێشتا مووچە دابەش نەکراوە.