حکومەتی هەرێم لەبارەی مووچە و هەڵبژاردنی پەرلەمانی کوردستان کۆدەبێتەوە
ئەرشیف.. کۆبوونەوەی ئەنجوومەنی وەزیران
SNN-
ئەنجوومەنى وەزیرانى هەرێمى کوردستان لەبارەى داهات و خەرجیى و میلاک و تۆمارى بایۆمەترى و ژمارەى وەزیفى کۆدەبێتەوە.
لە راگەیەندراوێکدا ئەنجوومەنى وەزیرانى هەرێمى کوردستان بڵاویکردووەتەوە کە ئەمڕۆ چوارشەممە کۆدەبێتەوە و لە کۆبوونەوەکەدا کێشە و چارەسەر و راسپاردە لەبارەى دەرئەنجامى کارەکانى لیژنەى وردبینیى هاوبەشى هەردوو دیوانى چاودێریى دارایى فیدراڵ و هەرێم لەبارەى داهات و خەرجیى و تۆمارى بایۆمەتریى و ژمارەى وەزیفى یەکگرتوو دەخرێتەروو.
بەگوێرەی راگەیەندراوەکە لە کۆبوونەوەکەدا کارەکانى لیژنەى هاوبەشى نێوان حکومەتى هەرێم و حکومەتى فیدراڵى تایبەت بە یەکخستنى رێکارە داراییەکان دەخرێتەروو.
هەروەها لە تەوەرێکی دیکەدا هەماهەنگیى نێوان کۆمیسیۆنى باڵاى سەربەخۆى هەڵبژاردنەکانى عێراق و سەرۆکایەتیی هەرێم و حکومەتى هەرێمى کوردستان لەبەر رۆشنایى دوا کۆبوونەوەى هاوبەش و راسپاردەکانى کۆبوونەوەکە بۆ ئەرک و رۆڵى وەزارەتەکان دەخرێتەروو
بەگوێرەی کارنامەکە لە کۆتاییدا وەزیرى بازرگانى و پیشەسازیى راپۆرتێک لەبارەى پرۆسەى کڕینەوە و وەرگرتنى گەنم لە جووتیارانى هەرێمى کوردستان و شایستە داراییەکانیان و بەبازاڕکردنى بەرهەمى گەنمى جووتیاران پێشکەشدەکرێت.
