لەبارەی مووچەی مانگی حەوت و لیستی مووچەی مانگی هەشتەوە زانیاری نوێ ئاشکرابوو

SNN

سەرچاوەیەک لە وەزارەتی دارایی هەرێم رایگەیاندووە، لەم دوو، سێ رۆژەدا تەمویلی مووچەی مانگی تەمموزی مووچەخۆرانی هەرێم رەوانەی بانکەکانی هەولێر دەکرێن، هاوکات هێشتا لیستی مووچەی مانگی ئاب ئامادە نەکراوە.

ئەمڕۆ یەکشەممە 25ی ئاب، سەرچاوەیەک لە وەزارەتى دارایى و ئابوورى حکومەتى هەرێمى کوردستان بە کەناڵ 8ی راگەیاند، چاوەڕێین لەم دوو سێ رۆژەدا تەمویلى مووچەى مانگى تەمموزى مووچەخۆران بکرێت کە خەرجییەکەى نزیکەى 957 ملیار دینارە، ئەگەر مووچە رەوانە نەکرێت ئەوکات ئەنجوومەنى وەزیران بڕیار لەسەر چوونى شاندى هەرێمى کوردستان دەدات بۆ بەغدا.

سەبارەت بە لیستی مووچەی مانگی ئاب ئەوەیخستووەتە ڕوو، هێشتا لیستى مووچەى مانگى ئاب ئامادە نەکراوە، چونکە بەشێک لەوانەى بایۆمەترییان کێشەى تێدایە یاخود نەیانکردووە، چاوەڕێن ئەوانە تەواو بکرێت و دواتر رەوانەى بەغدا بکرێت.

ئاماژەی بەوەکردووە، روونکردنەوەکەى وەزارەتى دارایى و ئابوورى بۆ هەموو لایەکى ئاشکراکرد، کە ژمارەى مووچەخۆران لە مانگى تەممووز کەمترە لە ژمارەى مووچەخۆرانى مانگى حوزەیران.

ئەمە لە کاتێکدایە نزیکەی 52 رۆژە مووچەی مانگی حەوتی مووچەخۆرانی هەرێم دابەشنەکراوە، بە فەرمیش هیچ وادەیەک بۆ دابەشکردنی دیاریی نەکراوە، هەریەکە لە بەرپرسانی حکومەتی هەرێم و ناوەند یەکتر تۆمەتبار دەکەن لە بوونی گرفتی زۆر لە لیستی مووچەدا.