کاروان یاروەیس: تیمی هونەریی کێشەکان قوڵتر دەکەنەوە
SNN
ئەندامێکی ئەنجوومەنی نوێنەرانی عێراق لە بارەی کێشەکانی مووچەی مووچەخۆرانی هەرێمەوە رایگەیاندووە، شاندەکەی هەرێم لە بەغدا نەگەیشتوونەتە رێککەوتن و ئەم کێشانەش دەبێت ئیرادەی سیاسی هەبێت، دەڵێت “تیمی هونەریی کێشەکان قوڵتر دەکەنەوە”.
کاروان یاروەیس، ئەندامی ئەنجوومەنی نوێنەرانی عێراق لە کۆنگرەیەکی رۆژنامەوانیدا رایگەیاند، شاندەکەی دوێنێ و پێرێ رۆشتوون بۆ بەغدا نەگەیشتوونەتە رێککەوتن و ئەنجام، هەر بۆیە شاندێکی تر چووەتە بەغدا.
ئاماژەی بەوەکردووە، بۆ چارەسەری کێشەکانی مووچە دەبێت دوو شت بکرێت یەکەم، ئیرادەیەکی سیاسی هەبێت ئەم کێشانە چارەسەر بکات، ئەم ژمارە گەورە و کێشە گەورانەی لەنێوان هەردوو حکومەت هەیە بە تیمی هونەری پێکەوە دابنیشن کێشەکان قوڵتر دەکەنەوە.
ئەو ئەندامەی ئەنجوومەنی عێراق دەڵێت، “واپێویستە وەفدێکی باڵای حکومەتی هەرێم بچنە بەغدا و لەگەڵ بەرپرسانی بەغدا کۆببنەوە و گفتوگۆ بکەن و کێشەکان چارەسەر بکەن”.
