مامۆستایانی ئاینی خۆبەخش لە پەراوێزخستیان لەلایەن حكومەتەوە نیگەرانن

SNN-عەلی حەمە سەعید
لەبەرامبەر پشتگوێخستیان و دانەمەزراندیان لە مزگەوتەكان و هاوكات بەردەوامیدان بە كاری خۆبەخشییان، مامۆستایانی ئاینی خۆبەخش نیگەرانن لەوەی كە هیچ لایەنێكی خۆی ناكات بەخاوەنیان و دامەزراندنیشان بەمافێكی سەرەتایی خۆیان دەزانن.

عەبدولستار زوبێر، یەكێك لەمامۆستایانی ئاینی خۆبەخش لە سنووری پارێزگای هەڵەبجە بە SNNی ڕاگەیاند: لەگەڵ نزیكبوونەوە لە هەڵبژاردنەكان حكومەتی هەرێم بە تایبەت سەرۆكی حكومەت بیری ئەوەی كەوتووەتەوە كە مامۆستایانی وانەبێژ دابمەزرێنێت، لەكاتێكدا ئێمەی مامۆستایانی خۆبەخش چەندین ساڵە لە مزگەوتەكان خزمەت دەكەین، بەڵام وەك ئەوەی مزگەوتەكان بێخاوەن بن هیچ لایەنێكی حكومی خۆی ناكات بەخاوەنی ئێمە مامۆستایانی خۆبەخش.

ئاماژەی بەوەشكرد، “ئێستا كە سەرۆكی حكومەت بڕیاریداوە كە بە پێدانی مینحەیەك كە كەس نازانێت بڕەكەی چەندە و بە كێش دەدرێت، ئەوەش جۆرێك لە بانگەشەی هەڵبژاردن و لەگەڵ كۆتایی هاتنی هەڵبژاردنەكان ئەو مینحەیەش كۆتایی دێت، چونكە پێدانی مینحە كاتییە و هەركات حكومەت تاقەتی نەما بە بیانوویەك پیدانی ئەو مینحەیە ڕادەگرێت.”