به سه‌رۆكایه‌تى بافڵ جه‌لال تاڵه‌بانى كۆبوونه‌وه‌ى سه‌ركردایه‌تى یه‌كێتى له هه‌ولێر به‌ڕێوه‌ده‌چێت
كۆبوونه‌وه‌ى ئه‌نجوومه‌نى سه‌ركردایه‌تى یه‌كێتى | فۆتۆ: SNN
SNN
بڕیاره ئه‌مڕۆ دووشه‌ممه 2ى ئه‌یلول، كۆبوونه‌وه‌ى ئه‌نجوومه‌نى سه‌ركردایه‌تى یه‌كێتیی نیشتمانيى كوردستان به سه‌رۆكایه‌تى بافڵ جه‌لال تاڵه‌بانى به‌ڕێوه‌بچێت.
به‌پێى زانیارییه‌كان، “كۆبوونه‌وه‌كه به سه‌رۆكایه‌تى بافڵ جه‌لال تاڵه‌بانى، سه‌رۆكى یه‌كێتیی نیشتیمانى كوردسان و به ئاماده‌بوونى ئه‌ندامانى مه‌كته‌بى سیاسى ئه‌و حزبه له شارى هه‌ولێر به‌ڕێوه‌ده‌چێت”.
به‌پێى زانیارییه‌كان، له كۆبوونه‌وه‌كه‌دا یه‌كێك له‌و ته‌وه‌ره سه‌ره‌كیانه‌ى كه تاوتوێده‌كرێت بریتیه له ئامادەکارییەکانی یەکێتی بۆ هەڵبژاردنی خولی شەشەمی پەرلەمانی کوردستان.
یه‌كێتى تر له‌و ته‌وه‌رانه‌ى كه له كۆبوونه‌وه‌ى ئه‌نجوومه‌نى سه‌ركردایه‌تى باسى لێوه‌ده‌كرێت بریتیه له پرسى مووچه‌ى مووچه‌خۆرانى هه‌رێمى كوردستان و پاڵپشتیه‌كانى ئه‌و حزبه له‌ڕێگه‌ى نوێنه‌ره‌كانیه‌وه له به‌غدا بۆ چاره‌سه‌ركردنى كێشه‌ى مووچه.
كۆبوونه‌وه‌كه‌ى ئه‌نجوومه‌نى سه‌ركردایه‌تى یه‌كێتى له‌كاتێكدایه كه شه‌وى رابردوو له ماڵى شاخه‌وان عه‌بدوڵا، جێگرى دووه‌مى سه‌رۆكى په‌رله‌مانى عێراق كۆبوونه‌وه‌ى لایه‌نه كوردیه‌كان به به‌شدارى سه‌رۆككۆمارى عێراق، وه‌زیره كورده‌كانى كابینه‌كه‌ى سودانى و سه‌رۆك فراكسیۆنه كوردیه‌كان به‌مه‌به‌ستى چاره‌سه‌ركردنى كێشه‌ى مووچه‌ى مووچه‌خۆرانى هه‌رێم به‌ڕێوه‌چوو.
