“یەكێتی خۆی بەخاوەنی پرۆژەیاسای بە پاریزگاكردنی هەڵەبجە دەزانێت”
چرۆ حەمەشەریف
SNN-عەلی حەمە سەعید
نوێنەرێكی پارێزگای هەڵەبجە لە پەرلەمانی عێراق ئاماژە بەوەدەكات یەكێتی نشتیمانی كوردستان بە هەموو توانایەوە لەهەوڵی یەكلایی كردنەوەی پرۆژەیاسای بە پارێزگاكردنی هەڵەبجەیە بۆ ئەومەبەستەش سەرۆكی یەكێتی و سەرۆك كۆمار و ئێمەش لە فراكسیۆنی یەكێتی بەڵێنمان لە لایەنە پەیوەندیدارەكان وەگرتووە لە نزیكترین كاتدا ئەو پرسە یەكلایی بكرێتەوە.
چرۆ حەمە شەریف، ئەندامی ئەنجومەنی نوێنەرانی عێراقی لە فراكسیۆنی یەكێتی بە SNNی ڕلگەیاند: هەوڵەكانمان بە ئاراستەی كۆتایی هێنان بە پرسی بە پارێزگاكردنی هەڵەبجە بەردەوامی هەیە، لەو چوارچێوەیەشدا سەرۆككۆماری عیراق لە نووسراوێكدا كە ئاڕاستەی سەرۆكی بەوەكالەتی ئەنجومەنی نوێنەرانی عیراقی كردووە، داوایكردووە كە بڕیاری بەپارێزگابوونی هەڵەبجە بخرێتە كارنامەی دانیشتنەكانی پەرلەمانەوە ئەمەش لەپێناو بەرژەوەندی گەل و پێزانین و وەفا بۆ خوێنی شەهیدان و ئەو قوربانیانەی گەلی كورد، كە رووبەڕووی كیمیاباران و ئەنفال بونەتەوە.
ئاماژەی بەوەشكرد، بەهۆی هەوڵە بەردەوامەكانی سەرۆكی یەكێتی و فراكسیۆنەكەمان لەئەنجومەنی نوێنەرانی عیراق، یەكێتی خۆی بەخاوەنی پرۆژە یاسای بەپارێزگابوونی هەڵەبجە دەزانێت، لەو چوارچێوەیەشدا هەوڵی زۆرمانداوە تا خوێندنەوەی یەكەم و دووەم بۆ پرۆژە یاساكە كراوە، بۆ خوێندنەوەی سێیەم و كۆتایی هێنان بە پرۆژە یاسای بەپارێزگابوونی هەڵەبجە 87 ئیمزای پەرلەمانتارانمان كۆكردۆتەوەو ئاڕاستەی سەرۆكایەتی پەرلەمانمان كردوە.
ئەو نوێنەرەی هەڵەبجە لە پەرلەمانی عێراق ئەوەشی خستەڕوو، ئەو واژۆیانەی كۆمان كردووەتەوە نوێنەری سەرجەم فراكسیۆنەكانی تێدایە و داوامان كردووە خوێندنەوەی سێیەم بۆ بەپارێزگابوونی هەڵەبجە بكرێت و دەنگی لەسەر بدرێت و هەوڵی كۆكردنەوەی زۆرترین دەنگیش دەدەین بۆ پرۆژە یاساكە، بۆ ئەوەی لەكاتی دەنگدان لەسەر پرۆژەكە بتوانرێت دەنگی پێویست بهێنێت، بەمەش هەڵەبجە دەبێتە 19هەمین پارێزگای عیراق.
