پاش 33 ساڵ له داخستنى، سویسرا باڵیۆزخانه‌كه‌ى له عێراق ده‌كاته‌وه
ئاڵاى سویسرا | فۆتۆ: freepik
SNN
وه‌زاره‌تى ده‌ره‌وه‌ى سویسرا رایگه‌یاند، باڵیۆزخانه‌كه‌یان له به‌غداى پایته‌ختى عێراق ده‌كه‌نه‌وه.
سویسرا یه‌كێكه له‌و وڵاتانه‌ى كه له ساڵى 1991 به‌هۆى شه‌ڕى كه‌نداوه‌وە هه‌ستا به داخستنى باڵیۆزخانه‌كه‌ى له عێراق.
پاش تێپه‌ڕینى 33 ساڵ، ئه‌مڕۆ سێشه‌ممه 3ى ئه‌یلول، وه‌زاره‌تى ده‌ره‌وه‌ى ئه‌و وڵاته رایگه‌یاند، “بڕیاریانداوه باڵیۆزخانه‌كه‌یان له به‌غداى پایته‌ختى عێراق دووباره بكه‌نه‌وه”.
وه‌زاره‌ته‌كه له به‌یاننامه‌یه‌كدا ورده‌كارى بابه‌ته‌كه‌ى ئاشكرا كردووه و ئاماژه‌ى به‌وە كردووه، “ئه‌نجوومه‌نى ناوه‌ندیی سویسرا ئامانجى له كردنه‌وه‌ى باڵیۆزخانه‌كه بریتیه له به‌هێزكردنى په‌یوه‌ندییه دوو قۆڵیه‌كانى نێوان هه‌ردوو وڵات. گه‌شه‌دان به په‌یوه‌ندییه‌كان له بواره‌كانى ئابوورى و ئاسایش”.
وه‌زاره‌تى ده‌ره‌وه‌ى سویسرا له به‌یاننامه‌كه‌یدا جه‌ختى له‌سه‌ر ئه‌وه‌شكردووه‌ته‌وه، “مه‌به‌ستیانه له بابه‌تى كۆچبه‌راندا گفتوگۆ له‌گه‌ڵ عێراق بكه له‌ڕێگه‌ى كردنه‌وه‌ى باڵیۆزخانه‌كه‌يان و به‌هێزتركردنى په‌یوه‌ندییه‌كانیان”.
