بۆچی مووچەی خانەنشینانی پێشمەرگە بەهاوتاكراوی دابەشناكرێت؟

SNN-عەلی حەمە سەعید
لەگەڵ ئەوەی ئەمڕۆ دەستكرا بەدابەشكردنی مووچەی مانگی حەوتی خانەنشینان، خانەنشینانی شارستانی و ناوخۆ بەهاوتاكراوی مووچەكانیان وەرگرت، بەڵام خانەنشینانی هێزەكانی پێشمەرگە نە مووچەیان پێدراوە و نە بەهاوتاكراویش مووچەیان پێدەدرێت.

بەگوێرەی ئەو زانیارییانەی كە لە بەرپرسێكی خانەنشینی هەرێم بە SNNدراون ئەوەخراوەتەڕوو، بڕیاری هاوتاكردنی مووچەی خانەنشینان لەگەڵ خانەنشینانی عێراق ئەو خانەنشینانەی گرتووەتەوە كە دۆسیەی تەواویان هەبووە و هیچ گرفتێك لە دۆسییەكانیاندا نەبووە، بە نمونە لە بابەتی فەرمانی دامەزراندن و ساڵانی خزمەت و بایۆمەتری و تادواجار فەرمانی خانەنشین بوونی.

ئاماژەی بەوەشكرد، سەرجەم خانەنشینانی شارستانی و خانەنشینانی ناوخۆ لە دۆسییەكانیاندا ئەو بەڵگەنامانەیان هەبووە و هیچ گرفتێكیان نەبووە، بۆیە ئەمڕۆ بەبێ‌ گرفت بەهاوتاكراوی مووچەكانیان بۆ خەرجكرا و مانگەكانی داهاتووش بە بێ‌ گرفت مووچەیان پێدەدرێت.

ئەو بەرپرسەی خانەنشینی هەرێم ئەوەشی خستەڕوو، هۆكاری ئەوەی كە ناتواندرێت مووچەی خانەنشینی پێشمەرگە بەهاوتاكراوی دابەشبكرێت ئەوەیە كە زۆرینەی ئەو كەسانەی مووچەی خانەنشینی پێشمەرگە وەردەگرن، لە دۆسیەكانیاندا فەرمانی دامەزراندن و ساڵانی خزمەت و بایۆمەتریان نییە و تەنها فەرمانی خانەنشین بوونیان هەیە، ئەمەش گرفتەو دەبێت چارەسەر بكرێت پاشان مووچەكانیان بەهاوتاكراوی دابەشدەكرێت.