ئەنجوومەنی وەزیران گفتوگۆ لەسەر کۆبوونەوەی شاندی هەرێم و بەغدا دەکات لەبارەی مووچە

SNN-

بڕیارە ئەمڕۆ چوارشەممە ئەنجومەنى وەزیران کۆببێتەوە و یەکێک لە تەوەرەکانی کۆبونەوەیەکەش تایبەتە بە کێشە هەڵپەسێراوەکانى حکومەتى هەرێم و فیدراڵ ، هەروەها ئەنجامى کۆبونەوەکەى هەفتەى رابردوى نێوان شاندى تەکنیکى وەزارەتى دارایی و ئابورى لەگەڵ وەزارەتى دارایی فیدراڵ دەخرێتەڕوو .

بەپێی کارنامەى کۆبونەوەى ئەمڕۆى ئەنجومەنى وەزیران، سێ تەوەرى سەرەکى گفتوگۆى دەکرێت، تەوەرى یەکەم خستنەڕوى رەشنوسى بڕیارێکى ئەنجومەنى وەزیرانە تایبەت بە یەکخستنى رێکارەکانى تایبەت بە سیستمى دارایی و ژمێریاریی لەنێوان حکومەتى هەرێم و فیدراڵ.

لە تەوەرى دوەمدا ئەنجامى کۆبونەوەکەى هەفتەى رابردوى نێوان شاندى تەکنیکى وەزارەتى دارایی و ئابورى لەگەڵ وەزارەتى دارایی فیدراڵ دەخرێتەڕو و تاوتوێی بەڕێوەچونى کارەکانى تیمە هاوبەشەکەیان دەکرێت.

لە تەوەرى سێیەمدا، ئامادەکاریی دەکرێت هەفتەى داهاتو کۆبونەوەیەکى تایبەتى ئەنجومەنى ئابورى وەزاریی فیدراڵ لە هەولێر بەڕێوەبچێت، کە تایبەت دەبێت بە دۆسییە هەڵپەسێردراوەکانى نێوان وەزارەتەکانى هەردو حکومەت.