بە بڕی 250 ملیۆن دۆلار ئەمریکا هاوکاریی سەربازی ئۆکرانیا دەکات

SNN

وەزیری بەرگری ئەمریکا رایگەیاندووە، بۆ جارێکی تر هاوکاریی سەربازیی ئۆکرانیا دەکات بە بڕی 250 ملیۆن دۆلار، ئەمەش پێداویستییە سەربازییەکانی ئۆکرانیا پڕدەکاتەوە.

لوید ئۆستن، وەزیری بەرگریی ئەمریکا ئاشکرایکردووە، وڵاتەکەی بە بڕی 250 ملیۆن دۆلار هاوکاریی سەربازی نوێی ئۆکرانیا دەکات، هاوکات ئەمەش دوای ئەوە دێت ڤلادیمێر زیلینسکی سەرۆکی ئۆکرانیا داوای لە ئەمریکا و وڵاتانی هاوپەیمان کردبوو کە هاوکاریی سەربازیی وڵاتەکەی بکرێت و رێگەیەک بۆ سنوردارکردنی لەشکرکێشییەکانی روسیا بگیرێتە بەر، بەتایبەت ئەو تاوانکاریانەی لە ناوچەی رۆژهەڵاتی دونیتسک دەیکات لە وڵاتەکەیدا.

زیلینسکی لە میانی کۆبوونەوەی هاوپەیمانانی کیێڤ لە بنکەی ئاسمانی ئەمریکا لە ڕامشتاین لە ڕۆژئاوای ئەڵمانیا جەختی لەوەکردەوە، داواتان لێدەکەم چالاکتر بن لە کارکردن لەگەڵ ئێمەدا لە بواری بەرگری ئاسمانیدا، هاوکات رێگەبدرێت بە بەکارهێنانی موشەکی دوور مەودا، نەک تەنها لەسەر خاکە داگیرکراوەکانی ئۆکرانیا، بەڵکو لەسەر خاکی ڕووسیاش.