وەزیری دارایی عێراق داوایكردووە هەموو بڕگەكانی یاسای خانەنشینی یەكگرتوو لەهەرێمی كوردستان جێبەجێبكرێن

SNN-عەلی حەمە سەعید

لەگەڵ ئەوەی مووچەی مانگی حەوتی خانەنشینانی شارستانی هەرێم بەهاوتاكراوی دابەشكرا بەڵام تا ئێستا ئەو یاسایە سەرجەم بڕگە و مادەكانی لەهەرێمی كوردستان بڕیاری لەبارەوە نەدراوە، بەتایبەت لەبارەی پێدانی ئیكرامییەی خانەنشینی كە لەعێراق 12 مووچەیە و لە هەرێم شەش مووچە، هاوكات تەمەنی خانەنشینی لەعێراق 60 ساڵە و لەهەرێم 63، بۆیە وەزیری دارایی عێراق داوایكردووە هەموو بڕگەكانی یاسای خانەنشینی یەكگرتوو لە هەرێمی كوردستان جێبەجێبكرێن.

بەگوێرەی زانیارییەكانی SNNكە لەسەرچاوەیەكی نزیك لە كۆبوونەوەكانی وەزیری دارایی عێراق و وەزیری داراری هەرێم دەستی كەوتوون ئەوەخراوەتەڕوو، تەیف سامی وەزیری دارایی عێراق پێخۆشحاڵی خۆی دەربڕیوە بە پابەند بوونی هەرێم بە بڕیارەكەی دادگای فیدراڵی لەبارەی دابەشكردنی مووچەی خانەنشینی شارستانی بەهاوتاكراوی، بەلام نیگكەران بووە لەوەی كە ئەو یاسایە بەسەر خانەنشینانی سەربازی جێبەجێنەكراوە.

ئاماژەی بەوەشكرد، وەزیری دارایی عێراق داوای لە وەزیری دارایی هەرێم كردووە كە پێویستە سەرجەم بڕگە و مادەكانی یاسای خانەنشینی عێراق لە هەرێمی كوردستانیش جێبەجێبكرێت، چونكە ناكرێت بڕگەیەكی جێبەجێبكرێت و بڕگەكانی دیكەی فەرامۆش بكرێت، بۆیە وەزیری دارایی هەرێمیش بەلێنی پابەند بوونی ئەو یاسایەوە دەربریوە.

هەر لە زانیارییەكانی SNNئەوەشهاتووە، ئەگەر هەرێمی كوردستان بەتەواوی پابەند ببێت بە جێبەجێكردنی یاسای خانەنشینی عێراق، ئەوا هەر فەرمانەرێك كاتێك خانەنشین دەبێت ڕاستەوخۆ 12 مووچەی تەواوەتی وەك ئیكرامییە پێدەدرێت، بەڵام لەهەرێمی كوردستان تەنها مووچەی شەش مانگ خەر دەكرێت، ئەوە سەرەڕای ئەوەی تەمەنی خانهەنشینی لەعێراق 60 ساڵە و لەهەرێم 63 ساڵە.