“حكومەتی هەرێم ڕەزامەندیدا بەگواستنەوەی مووچە و میلاكی فەرمانبەرانی كەركوك بۆ سەر بەغدا”

SNN-عەلی حەمە سەعید

بەمەبەستی چارەسەركردنی گرفتەكانی ناو لیستی مووچەی فەرمانبەرانی هەرێم لە كۆبوونەوەی شاندی ئابوری عێراق و هەرێم، حكومەتی هەرێم ڕەزامەندی نیشانداوە كە سەرجەم ئەو فەرمانبەر و مامۆستایانەی لە سنوری پارێزگای كەركوك و ناوچە دابڕاوەكان دامەزراون و لەسەر حكومەتی هەرێم مووچەیان وەرگرتووە بگوازرێنەوە سەر وەزارەتی دارایی عێراق.

بەگوێرەی زانیارییەكانی SNN لە دواین كۆبوونەوەی هەردوو شاندی ئابوری حكومەتی هەرێم و حكومەتی عێراقی، هەردوو ڕێككەوتوون كە مەبەستی چارەسەركردنی بەشێك لەو گرفتانەی كە لە لیستی مووچەی مانگانەی فەرمانبەرانی هەرێم هەن، پێویستە سەرجەم فەرمانبەران و مامۆستایانی سنوری مادەی 140 بگوازرێنەوە بۆ سەر وەزارەتی دارایی و ئابوری حكومەتی عێراق.

ئاماژە بەوەشكراوە، لەكۆبوونەوەكەدا بەرپرسانی حكومەتی هەرێم ڕەزامەندییان لەسەر ئەو داواكارییەی شاندی عێراقی دەربڕیوە و بڕیاردراوە كە تا مانگی 12ی ئەمساڵ ڕاژەی ئەو مامۆستا و فەرمانبەرانە بگوازرێنەوە سەر وەزارەتی دارایی عێراق و لەساڵی نوێوە مووچە لەسەر حكومەتی عێراق وەربگرن.