سودانی بۆ ناردنی مووچەی فەرمانبەرانی هەرێمی کوردستان بڕیاریدا

SNN-

وەزیری ژینگەی عێراق رایگەیاند: ئەنجومەنی وەزیرانی عێراق بڕیاریدا تاوەکو کۆتایی ئەمساڵ مووچەی فەرمانبەرانی هەرێمی کوردستان بنێردرێت.

ئەمڕۆ ئەنجوومەنی وەزیرانی عێراق بە سەرۆكایەتی محەمەد شیاع سودانی، سەرۆكوەزیرانی عێراق كۆبووەوە و تیایدا بڕیار درا بە خەرجكردنی مووچەی فەرمانبەرانی هەرێمی كوردستان.

نزار ئامێدی، وەزیری ژینگەی عێراق ڕایگەیاندووە، ناردنى مووچە لە بەغدادەوە بۆ هەرێمى کوردستان تاوەکو کۆتایی ئەمساڵ بێ گرفت بەردەوام دەبێت و حکومەتى هەرێمى کوردستان بەڵێنیداوە تاوەکو کۆتایی ئەمساڵ تێبینییەکانى بەغدا لەسەر لیستى مووچە چارەسەر بکات.

پێشتر تەیف سامی، وەزیری دارایی عێراق ڕایگەیاند، كە مووچەی مانگی 8یان بۆ هەرێم ناردووە و تەنها بڕی 38 ملیار دینار بۆ مووچەی مانگی 7 ڕەوانە كراوە بەهۆی ئەوەی لە مانگەكانی ڕابردوودا پارەی زیاتر بۆ هەرێم ڕەوانەكراوە، بۆیە ئەو پارەیەیان گلداوەتەوە.

دوێنێ‌ دوو شەممە، 9ی ئەیلوول، تیمی هەردوو حکومەتی هەرێمی کوردستان و عێراق ڕاگەیەنراوێکی هاوبەشیان بڵاوکردەوە و و رایانگەیاند:”ئەنجوومەنی وەزاریی بۆ ئابووری بڕیاریدا بە پێشکەشکردنی ڕاسپاردەیەک بۆ ئەنجوومەنی وەزیرانی فیدڕاڵ بۆ ئاڕاستەکردنی وەزارەتی دارایی فیدراڵ بۆ چارەسەرکردن و ناردنی مووچە ڕاگیراوەکانی هەرێمـی کوردستان، ئەوانەی بەهۆی تەواونەکردنی بایۆمەتری دوورخرابوونەوە”.