سەرۆککۆماری ئێران سەردانی هەولێر و سلێمانی دەکات

SNN-

ئەمڕۆ پێنجشەممە مەسعود پزیشكیان سەرۆککۆماری ئێران سەردانی هەولێر و سلێمانی دەکات و لەگەڵ سەرۆکی هەرێم کۆدەبێتەوە و لە سلێمانیش لەگەڵ بافڵ جەلال تاڵەبانی سەرۆکی یەکێتی نیشتمانی کۆدەبێتەوە.

دوێنێ چوارشەممە 11ی ئەیلولی 2024، مەسعود پزیشکیان، سەرۆککۆماری ئێران بە سەردانێکی فەرمی گەیشتە بەغدا و لەلایەن محەمەد شیاع سودانی، سەرۆکوەزیرانی عێراقەوە پێشوازیی لێکرا و بڕیارە سەردانەکەی بۆ عێراق و هەرێمی کوردستان سێ رۆژ بخایەنێت.

پزیشکیان لە سەرۆکایەتی هەرێمی کوردستان لەگەڵ نێچیرڤان بارزانی، سەرۆکی هەرێمی کوردستان کۆدەبێتەوە و سەرۆکایەتیی ئەنجوومەنی وەزیرانیش بەشداری کۆبوونەوەکە دەکات.

دوای سەردانی بۆ هەولێر دوانیوەڕۆی ئەمڕۆ پێنجشەممە سەرۆککۆماری ئێران سەردانی شاری سلێمانیش دەکات و دەچێتە مەزاری مام جەلال دواتریش لەگەڵ بافڵ جەلال تاڵەبانی، سەرۆکی یەکێتی نیشتمانی کوردستان کۆدەبێتەوە.

محەمەد مەحمودیان، کۆنسووڵی ئێران لە سلێمانی  رایگەیاند: ”پزیشکیان سبەی نیوەڕۆ دەگاتە شاری سلێمانی، سەردانی گڵکۆی مام جەلال دەکات و دواتر لەگەڵ بافڵ تاڵەبانی کۆدەبێتەوە، وتیشی: بە لەبەرچاوگرتنی ئەو پەیوەندییە قووڵەی کە لە نێوان ئێران و مام جەلالدا (سکرتێری کۆچکردووی یەکێتیی نیشتمانیی کوردستان و سەرۆککۆماری پێشووی عێراق) هەبوو، لەکاتی گەیشتنی، یەکەم وێستگەی سەرۆککۆمار  سەردانی مەزاری مام جەلال دەکات”.

لەبارەی پەیوەندییەکانی هەرێمی کوردستان و ئێران، مەسعود پزیشکیان دوێنێ بە زمانی کوردی بە رۆژنامەنووسانی وت:”پەیوەندیی ئێران لەگەڵ هەرێمی کوردستان پەیوەندییەکی باشە و باشتری دەکەین.”