هەشت کۆچبەر بەهۆی ژێرئاو کەوتنی بەلەمەکەیان خنکان
SNN
پۆلیسی فەڕەنسا رایگەیاند، لە نۆکەندی ئینگلیز بەلەمێکی کۆچبەران کە لە فەڕەنساوە بۆ بەریتانیا دەچوو ژێرئاوکەتووە و بەهۆیەوە هەشت کۆچبەر خنکاون.
بەگوێرەی زانیارییەکانی ئاژانسی فرانس پرێس، پۆلیسی فەڕەنسا رایگەیاندووە شەوی شەممە لەسەر یەکشەممە بەلەمێکی کۆچبەران بە ماوەیەکی کەم دوای بەڕێکەوتنی لە کەناراوەکان ی باکوری وڵاتەکەدا نوقمبووە.
ئاماژەی بەوەکردووە، بەلەمەکە لە نۆکەندی ئینگلیز نوقمبووە لەو رووداوەدا بەلایەنی کەمەوە هەشت کۆچبەر خنکاون، ژمارەیەکیشیان لەلایەن تیمە فریاگوزارییەکانەوە رزگارکراون.
ئەوەخراوەتە روو، ژمارەی ئەو کۆچبەرانەی لە سەرەتای ئەمساڵەوە لە نۆکەندی ئینگلیزدا خنکاون، گەیشتە 45 کەس، بەراورد بە ساڵی رابردوو 12 کەس خنکا بوون.
هاوکات بەرپرسانی بەریتانیا ئاشکرایانکردووە، لە سەرەتای ئەم ساڵەوە، زیاتر لە 22 هەزار کۆچبەر لە رێگەی نۆکەندی ئینگلیزەوە گەیشتوونەتە بەریتانیا.
