پارتی گەڕایەوە ناو ئەنجومەنی پارێزگای كەركوك و بایكۆتی شكاند
قهڵاى کەرکوک | فۆتۆ: SNN
SNN-عەلی حەمە سەعید
دوای چەندین مانگ لە بایكۆتی چوونە ناو ئەنجومەنی پارێزگای كەركوك، ئەمڕۆ فراكسیۆنی پارتی لە ئەنجومەنی پارێزگای كەركوك بایكۆتیان شكاند و سەرۆكی فراكسیۆنەكەش دەڵێت: ئێمە هیچ گرفتێكمكان لەگەڵ پارێزگار و سەرۆكی ئەنجومەنی پارێزگای كەركوك نییە
حەسەن مەجید، سەرۆكی فراكسیۆنی پارتی لە ئەنجومەنی پارێزگای كەركوك بە SNNی ڕاگەیاند: ئەمڕۆ بە بڕیارێكی تایبەت گەڕاینەوە ناو ئەنجومەنی پارێزگای كەركوك و نوسینگە و ئۆفیسی خۆمان لە ناو ئەنجومەنی پارێزگا كردەوە، ئەوەش لە پێناو خزمەتكردن بەو دەنگدەرانەی كە لە هەڵبژاردنەكانی ئەنجومەنی پارێزگا دەنگیان پێدابووین.
ئاماژەی بەوەشكرد، ئێمە لەم قۆناغەدا تەنها لە ناو بینای ئەنجومەنی پارێزگا دەوامی ئاسایی خۆمان دەكەین، بەڵام هێشتا بڕیارمان نەداوە بەشداری كۆبوونەوەكانی ئەنجومەنی پارێزگای كەركوک بكەین، ئەوەش لەماوەكانی داهاتوو بڕیاری لەبارەوە دەدەین، هاوكات ئێمە هیچ گرفتێكمان لەگەڵ پارێزگاری كەركوك و سەرۆكی ئەنجومەنی پارێزگا نییە و چاوەرێی بڕیاردانی كۆتایین لەسەر ئەو سكاڵایەی تۆماركراوە لەسەر شێوازی بەڕێوەچوونی هەڵبژاردنی پارێزگار و سەرۆكی ئەنجومەنی پارێزگا لە بەغدا.
وتەكانی سەرۆكی فراكسیۆنی پارتی لە كاتیكدایە كە زیاتر لە مانگێكە پارێزگاری كەركوك سەرۆكی ئەنجومەنی پارێزگای كەركوك هەڵبژێردراون، بەڵام تا ئێستا فراكسیۆنی پارتی و بەشێك لە توركمانەكان نەگەڕاونەتەوە بۆ بینای ئەنجومەنی پارێزگا، ئەمڕۆش پارتی كۆتایی بە بایكۆت هێناو گەڕایەوە ناو بینای ئەنجومەنی پارێزگای كەركوك.
