وتەبێژی كۆمیسیۆن: سزای ئەولایەنانە دەدەین كە پێشوەختە بانگەشەیان دەستپێكردووە

SNN-عەلی حەمە سەعید

ماوەی چەند ڕۆژێكە هەریەكە لە حزبەكانی نەوەی نوێ‌ لە سلێمانی و پارتی لە دهۆك و هەولێر و چەند ناوچەیەكی دیكە، دەستیان بە بانگەشەی پێشوەختەی هەڵبژاردن كردووە بە بلاوكردنەوەی ژمارەی لیستەكانیان، وتەبێژی كۆمیسیۆنیش جەخت دەكاتەوە كە لیژنەیەكی تایبەت بەو بابەتە پێكدەهێنین و سزای ئەو لایەنانەش دەدەن.

جومانە غەلای، وتەبێژی كۆمسیۆنی باڵای سەربەخۆی هەڵبژاردنەكانی عێراق بە SNNی ڕاگەیاند: ئێمە پێشتر هۆشداریمان داوەتە هەموو بەربژێرە سەربەخۆ و بەربژێری لایەنە سیاسییەكان كە خۆیان بەدوور بگرن لە دەستكردن بە بانگەی پێشوەختەی هەڵبژاردن لەكاتێكدا ئێمە هێشتا هیچ وادەیەكمان بۆ بانگەشەی هەڵبژاردن دیاری نەكردووە.

ئاماژەی بەوەشكرد، جۆر و بڕی سزای ئەو كاندید و لایەنانەی كە ئێستا دەستیان كردووە بە بانگەشەی هەڵبژاردن لەلایەن ئەنجومەنی كۆمیسیارانەوە دیاری دەكرێت، بەجۆرێك لەلایەن كۆمیسیۆنەوە لیژنەیەكی تایبەت بە دیاركردنی جۆری سەرپێچییەكان پێكدەهێنن دوای كۆكردنەوەی بەڵگەكان دواترئاراستەی بەشی سكاڵا و تانەكان دەكرێت لەوێش لیژنەیەكی یاسایی پێكدەهێندرێت بۆ دیاری بڕی ئەو سزایەی كە پێویستە بخرێتە سەر ئەو كاندید و لایەنانەی سەرپێچییەكەیان ئەنجامداوە بۆیە بەدڵنیاییەوە سزا دەدرێن.

وتەكانی وتەبێژەكەی كۆمسیۆن لەكاتێكدایە كە ماوەی چەند رۆژێكە هەریەكە لە نەوەی نوێ‌ و پارتی دیموكراتی كوردستان و چەند بەربژێرێكی سەربەخۆ دەستیان كردووە بە بانگەشەی هەڵبژاردن، لەكاتێكدا كۆمیسیۆن وادەی دەستپێكردنی بانگەشەی دیاری نەكردووە ئەوەش پێچوانەی یاساكانی كۆمیسیۆنە.