ئەنجامدانی ریفراندۆم لەو وادەیە ئەنجامەكەی لەدەستدانی لە%50ی خاكی هەرێم وگەڕانەوەبوو بۆ باوەشی عێراق

SNN-عەلی حەمە سەعید

پەرلەمانتارێکی خولی پێنجەم لە پەرلەمانی کوردستان جەخت لەوەدەکاتەوە، “ئەنجامدانی ڕیفراندۆم لەو وادەیەی کە مەسعود بارزانی سوربوو لەسەر ئەنجامدانی، ئەنجامەكەی لەدەستدانی لە%50 ی خاكی هەرێم و دواتر گەڕانەوە بوو بۆ باوەشی عێراق.”

عەبدولناسر ئەحمەد، ئەندامی خولی پێنجەمی پەرلەمانی كوردستان لە فراكسیۆنی یەكێتی بە SNNی ڕاگەیاند، ئەنجامدانی ڕیفراندۆم لەو وادەیەی کە مەسعود بارزانی سوربوو لەسەر ئەنجامدانی بۆ ئەوەبوو کە چارەنوسی کەرکوک و ناوچە دابڕاوەکانی دیکە کە ئەوکاتە لەژێردەستی حکومەتی هەرێمبوون دەربهێندرێنەوە و بدرێنەوە بە عێراق، تەنها لهبەر ئەوەی یەکێتی لەو ناوچانە باڵا دەست بوو زۆرینەی دانیشتووانەکەی ئەندامان و لایەنگرانی یەکێتی بوون بە ئێستاشەوە، بەڵام ئەمە لای پارتی و مەسعود بارزانی زۆر قورس بوو، بۆیە لەکاتی دانانی پارێزگاری نوێی کەرکوک بینیمان هەرچی پلان هەبوو گرتیانە بەر تەنها بۆ ئەوەی پارێزگاری کەرکوک لە یەکێتی نەبێت.

ئاماژەی بەوەشکرد، زۆرمان پێسەیرە سەرۆكی حكومەت ناوبەناو باس لە سەركەوتن دەكات وەك ئەوەی هاووڵاتیان هیچ كێشە و گرفتێكیان نەبێت و تەواوی پێداویستییەكانیان بۆ دابینكرابێت، لە كاتێكدا ساڵ لەدوای ساڵ لەسایەی ئەم كابینەدا ژیانی هاووڵاتیان گران دەبێت و مووچەی فەرمانبەران لەكاتی خۆیدا نادرێت و تادێت قەرزەكانی سەر هەرێم زیاد دەكەن سەرۆكی حكومەتیش باس لە سەركەوتن دەكات.

ئەو ئەندامەی خولی پێنجەمی پەرلەمانی کوردستان ئەوەشی خستەڕوو، “ئەگەر جیاوازیكردن لە نێوان شاروشارۆچكەكانی هەرێم و ئەنجامدانی ڕیفراندۆم و دواتر ئەنجامەكەی لەدەستدانی لە%50 ی خاكی هەرێم و دواتر گەڕانەوە بۆ باوەشی عێراق و دواكەوتنی مووچە و هەروەها قەرزاربوونی هەرێم بە زیاتر لە 30 ملیار دۆلار و دامەزراندنی ژێربەژێری بۆ كەسە نزیكەكانی حزبەی كردووە ئەمانە سەركەوتن بن، ئێمە دەڵێن ئەو سەركەوتنانە پیرۆزی خۆی بێت و ئێمە شانازی بەو جۆرە سەركەوتنانەوە ناكەین.”