لە SNNەوە وردەكاری ژمارەی کاندید و چاودێرە ناوخۆیی و بیانییەكان بۆ هەڵبژاردنی پەرلەمان بزانە

SNN-عەلی حەمە سەعید

دوای ئەوەی ئەمڕۆ لەلایەن ئەنجومەنی كۆمیسیارانەوە ناوی سەرجەم کاندیدی لایەنە سیاسییەكان بۆ خولی شەشەمی پەرلەمان پەسەندكران، وتەبێژی كۆمیسیۆنی باڵا سەر بەخۆی هەڵبژاردنەكانی عێراق وردەكاری ژمارەی كاندیدەكان و هاوكات ژمارەی چاودێرە ناوخۆیی و بیانییەكان بۆ بەڕێوەچوونی پرۆسەی هەڵبژاردن ئاشكرا دەكات.

جمانە غەلای، وتەبێژی كۆمیسیۆنی بالای سەر بەخۆی هەڵبژاردنەكانی عێراق بە SNNی ڕاگەیاند:بۆ هەڵبژاردنی پەرلەمانی كوردستان كە بڕیارە لە 20ی مانگی داهاتوو بەڕێوەبچێت، 159 چاودێری نێودەوڵەتی و هەروەها 31 ڕۆژنامەنوسی نێودەوڵەتی و 207 چاودێری ناوخۆیی و دوو هەزار و 638 چاودێری تایبەت بە لایەنە سیاسییەكان چاودێری پرۆسەی هەڵبژاردنی پەرلەمانی كوردستان دەكەن.

ئاماژەی بەوەشكرد، كۆی گشتی ژمارەی كاندیدەكان بۆ پەرلەمان بریتین لە هەزار و 191 کاندید، لەو ژمارەیەش 823 کاندیدی پیاو و 368 کاندیدی ژن لەخۆدەگرێت، هاوكات کاندیدی هاوپەیمانێتیەكان برتییە لە 123 کاندید و کاندیدی حیزبەكانیش پێكدێن لە 949 کاندید.

وتەبێژەكەی كۆمیسیۆن ئەوەشی خستەڕوو، ژمارەی كورسییەكانی پارێزگای سلێمانی بریتیتن لە 38 كورسی و دوو كورسیش بۆ پێكهاتەكان دنراوە، هاوكات لە پارێزگای دهۆكیش 25 كورسی دانراوە و یەك كورسیش بۆ پێكهاتەكانە، لە پارێزگای هەڵەبجەش سێ‌ كورسی دانراوە و هیچ كورسییەك بۆ پێكهاتەكان دانەنراوە، هەروەها ژمارەی کاندیدی سەربەخۆ 119 کاندیدە و ژمارەی کاندیدی گشتی 84 کاندیدن، بۆ پێكهاتەكانیش توركمان 20 کاندیدو مەسیحیش  18کاندیدیان هەیە، هاوكات ژمارەی كورسییەكانی پارێزگای هەولێر 34 كورسییە لەو ژمارەیە 2 كورسی بۆ پێكهاتەكانە.