” لەم هەڵبژاردنە کۆتایی بەحوكمی خۆسەپێنی و قۆرخكاری دەهێنین”

عەلی حەمەسەعید-SNN                                                               

ئەندامێکی سەرکردایەتی یەکێتی ئەماژە بەوەدەکات یەکێتی چاوی لەوەیە لەسەرجەم بازنەکانی هەڵبژاردنی پەرلەمانی کوردستان زۆرترین دەنگی دەنگدەران بەدەستبهێنێت، ئەوەش لەپێناو ئەوەی کە بتوانین لەم هەڵبژاردنەدا کۆتایی بە حوکمی خۆسەپێنی و قۆرخکاری بهێنین.

ئاراس محەمەد ئاغا، ئەندامی سەرکردایەتی یەکێتی بە SNNی ڕاگەیاند: بەگوێرەی ئەو پلانەی دامانڕشتووە مەبەستمانە کە لەهەرچواربازنەکەی هەڵبژاردن لەپلەی یەکەمدابین، چونکە هەموولایەک ئەو ڕاستییە دەزانن کەساڵانێکی زۆرە حزبێک قۆرخکاری لەسەرجەم جومگەکانی دەستەڵاتکردووە و خۆسەپێنی کردووە بەکارێکی ئاسایی بەتایبەت لە سنوری دهۆک و هەولێر.

ئاماژەی بەوەشکرد، لەگەڵ ڕێکخستنەکانی خۆمان لەسنووری پارێزگای دهۆک کۆبووینەتەوە وئامادەکاری پێویستمان کردووە بۆ ئەوەی بەشێوەیەکی باش لەڕۆژی دەنگدان هاووڵاتیان بڕۆنە سەرسندۆقەکانی دەنگدان وبەدەنگەکانیان کۆتایی بەحوکمی خۆسەپێنی و قورخکاری بهێنن لە سنووری پارێزگای دهۆک.

ئەو ئەندامەی سەرکردایەتی یەکێتی ئەوەشی خستەڕوو،  ئەم هەڵبژاردنە هەڵبژاردنێكی چارەنووسسازە و یەكێتی دەیەوێت لەم هەڵبژاردنەدا سەركەوتنی گەورە بەدەستبهێنێت، بۆیە تەواوی ئامادەكارییەكی كردووە و دەیەوێت لەداهاتوودا حكومەتێكی خزمەتگوزار بێتەكایەوە کە جیاوازی لەنێوان پارێزگاکانی هەرێم نەکات.