نەبوونی خزمەتگوزاری هاووڵاتیانی پرۆژەیەكی نیشتەجێبوونی لە هەولێر هێنایە سەرشەقام

SNN-عەلی حەمە سەعید

ئەمڕۆ جارێكی دیكە دانیشتووانی پرۆژەی نیشتەجێبوونی زەیتون لە شاری هەولێر دەستیان بە خۆپیشاندانی ناڕەزایەتیكردووە ئەوەش بە هۆی نەبوونی خزمەتگوزارییەكانی ئاو كارەبا و و وەرگرتنی بڕە پارەیەك وەك سەرانە بە ناوی خزمەتگوزاری لەسەریان.

وەلید سادق، یەكێك لە بەشداربووانی خۆپیشاندانەكە بە SNNی ڕاگەیاند: ئەمە بۆ چەندین جارە ئێمە لە شاری زەیتون دەستدەكەین بە خۆپیشاندانی ناڕەزایەتی، ئەوەش بەهۆی ئەوەی كە لەناو پرۆژەكەماندا خزمەتگوزارییەكانی وەك ئاو و كارەبا بوونی نییە و هاوكات بڕە پارەیەكیشمان وەك سەرانە لێ وەردەگیرێت بە ناوی خزمەتگوزارییەوە بەڵام خزمەتگوزارییمان نییە.

ئاماژەی بەوەشكرد، ژمارەی دانیشتووانی ئەم پرۆژە نیستەجێبوونە زیاد لە سێ‌ هەزار ماڵ دەبین، هاوكات جێبەجێكاری پرۆژەكەش كەلەلایەن حزبی دەستەڵاتدارەوە پشتیوانی لێدەكرێت لە هەولێر ڕاستگۆ نەبووە بەرامبەر بەو بەڵێنانەی كە پێی داین لەكاتی دروستكردنی یەكەكان، بەتایبەت لە هەبوونی قوتابخانە و نەخۆشخانە و مزگەوت و چەند خزمەتگوزارییەكی دیكە كە دەبوو لەو پرۆژەیەدا بوونی هەبوایە.

ئەو هاووڵاتییەی دانیشتووی پرۆژەی نیشتەجێبوونی زەیتوون ئەوەشی خستەڕوو، ئەمە بۆچەندین جارە خۆپیشاندانی ناڕەزایەتی ئەنجام دەدەین بەڵام بەهۆی ئەوەی كۆمپانیای جێبەجێكار پاڵپشتی حزبی دەستەڵاتی هەیە و هەروەها حكومەتیش بێباكە لە ئاست داواكارییەكانمان بۆیە هیچ كەس نایەت بەدەم جێبەجێكردنی داواكارییەكانمانەوە.