“ئەمڕۆ بەغدا 243 ملیار دینار وەک تەواوی مووچەی مانگی هەشت رەوانەی هەرێم دەکات”
پارەی 25 هەزاری عێراقی
SNN
بڕیارە ئەمڕۆ وەزارەتی دارایی حکومەتی عێراق کۆتا گوژمەی مووچەی مانگی هەشتی مووچەخۆرانی هەرێم رەوانەی بانکەکانی هەرێم بکات، دوابەدوای گەیشتنی پارەکە خشتەی مووچە بڵاودەکرێتەوە و دەست بە دابەشکردنی دەکرێت.
سەرچاوەیەک لە نوێنەرایەتی حکومەتی هەرێمی کوردستان لە بەغدا بە میدیای گۆڕانی راگەیاندووە، بڕیارە ئەمڕۆ وەزارەتی دارایی عێراق 243 ملیار دینارەی تەواوکارە بۆ مووچەی مانگی ئاب بنێرێت، بەوەش لەگەڵ 755 ملیارەکەی دیکە کورتهێنانی مووچەی مانگی ئاب پڕدەبێتەوە و مووچە دابەش دەکرێت.
ئەوەشخراوەتە ڕوو، لەگەڵ پارەدارکردنەکە و پڕکردنەوەی کورتهێنانەکە، هەر ئەمڕۆ لیستی مووچەی مانگی ئاب رادەگەیەنێت و لە سێ بۆ چوار رۆژیشدا مووچەی سەرجەم مووچەخۆرانی هەرێمی کوردستان دابەش دەکرێت.
هاوکات، دوو رۆژە وردبینیکردن لە مووچەی مانگی ئەیلول دەستیپێکردوە و تا 15ی ئەم مانگە لەپێش هەڵبژاردندا مووچەیەکی دیکەش دابەش دەکرێت.
سەرچاوەیەک لە وەزارەتی دارایی هەرێم بە SNNی رایگەیاند، وەزارەتی دارایی هەرێم لەسەر فەرمانی مەسرور بارزانی، دابەشكردنی مووچەی ڕاگرتووە، ئەوەش بە بیانووی ئەوەی گوایە بڕی 240 ملیار دینار كورتهێنان هەیە، لەكاتێكدا بەغدا بڕی 750 ملیار دیناری ڕەوانە كردووە و بڕی زیاتر لە 200 ملیار دینار داهاتی سێ مانگی ڕابردووش لەبەردەستدایە، بەڵام هەرێم نایەوێت بڕی ئەو داهاتە بۆ بەغدا ئاشكرا بكات بۆیە چاوەڕێی بەغدایە بڕی 240 ملیار دیناری بۆ بنێرێت.
ئەمە لە کاتێکدایە ئەمڕۆ یەکی تشرینی یەکەمە و هێشتا مووچەخۆرانی هەرێم مووچەی مانگی هەشتیان وەرنەگرتووە.
