دوای تێکچوونی دۆخی لوبنان، هەرێم چاوی لە بازرگانە لوبنانییەکانە

SNN

بەهۆی هێرش و بۆردومانەکانی ئسیڕائیل بۆ سەر پێگە و بنکەکانی حزبوڵای لوبنانی، دۆخێکی ئەمنی نا سەقامگیر و خراپ باڵی بەسەر وڵاتی لوبناندا کێشاوە و لەکاتی ئیستاشدا هەرێمی کوردستان چاوی بڕیوەتە سەرمایەدارەکانی لوبنان تا بیانهێنێتە نێو هەرێمەوە.

فەرمان حسێن، شارەزای بواری ئابووری ئاماژە بەوە دەکات، هەرێمی کوردستان خاک و شوێنێکی گرنگە بۆ وەبەرهێنان، جا لە بوارەکانی گەشتوگوزار یاخود نیشتەجێبوون و یاخود کشتوکاڵی، دەستی بیانی بەلای خۆیدا رادەکێشێت تا وەبەرهێنانی گەورەی تێدا بکەن.

فەرمان دەشڵێت، لەکاتی ئیستادا ژمارەیەکی زۆر سەرمایەداری وڵاتانی کەنداوی عەرەبی و تورک و ئێران، لە هەرێم سەرقاڵی کاری بازرگانی خۆیانن، دوای تێکچوونی دۆخی لوبنانیش وا پێشبینی دەکرێت کە دەوڵەمەند و سەرمایەدارێکی زۆری لوبنانی روو لە هەرێم بکەن بۆ وەبەرهێنان، کە یەکەم بەهۆی نزیکی ناوچەکە و دووەم بەهۆی نزیکی کلتوری و نەتەوەی لوبنان و هەرێم.

وتیشی “سەرمایەدارانی لوبنان زیاتر لە بوارەکانی گواستنەوە و نیشتەجێبوون و گەشتیاریدا ئەزموونیان هەیە کە هەرێمی کوردستان لەم کاتەدا پێویستی بە هەر سێ جۆر لە وەبەرهێنانە بە تایبەتی کەرتی گەشتوگوزار کە ماوەی 10 ساڵێک دەبێت لە هەرێم بوژانەوەی بەخۆوە بینیوە”.