پارەی گەنمی جوتیارانی سلێمانی دابەشدەكرێت

SNN-عەلی حەمە سەعید

دوای ئەوەی بەراورد بە جوتیارانی پارێزگاكانی هەولێر و دهۆك و هەڵەبجە دابەشكردنی پارەی گەنمی ئەو جووتیارانەی گەنمیان ڕادەستی سایلۆی پیرەمەگروون كردبوو دواكەوت، وابڕیاری رۆژی چوار شەممە دەستبكرێت بەدابەشكردنی پارەی گەنجی ئەو جوتیارانەی كە پسوولەكەیان بەناوەوەیە.

نەسرین ئەحمەد، بەڕٍێوەبەری سایلۆی پیرەمەگرون بە SNNی ڕاگەیاند:رۆژی چوارشەممە 2ی 10ی 2024 چەكی پارەی ئەو جووتیارانە دابەشدەكرێت كە تائێستا پارەیان وەرنەگرتووە، هاوكات ئەو جوتیارانە پارەیان پێدەدرێت كە ژمارەی پسوولەی (1417) پارەكانیان دابەش دەكرێت،هاوكات بڕی پارەكە بەپێی گەنمی ڕادەستكراو دەدرێتە جووتیارەكە، كە پسوولەكەی بەناوەوەیە.

بەگوێرەی زانیارییەكانی SNNدەوای چارەسەركردنی كێشەی نەخوێندنەوەی چەكی شایستە داراییەكانی جووتیاران لە بەغدا، بەڕێوەبەرایەتی سایلۆكانی پارێزگای سلێمانی جووتیارانی ئاگەداركردەوە، كە ئەو گرفتە چارەسەربووە و جوتیاران دەتوانن لە سایلۆی پیرەمەگروون سەردانی هۆبەی ژمێریاری بەڕێوەبەرایەتی سایلۆكانی سلێمانی بكەن بۆ وەرگرتنی چەكی شایستە داراییەكانیان.

ئەوەش لەكاتێكدایە كە لە 12ی مانگی ڕابردووەوە چەكی پارەی گەنمی كڕدراوە جووتیارانی سنووری هەردوو پارێزگای سلێمانی و هەڵەبجە و هەردوو ئیدارەی سەربەخۆی گەرمیان و ڕاپەڕین كە بڕەكەی 67 ملیار 84 ملیۆن دیناربوو گەیشتە بەڕێوەبەرایەتیی سایلۆكانی سلێمانی، بەڵام زیاتر لە 10 ڕۆژ بوو بەهۆی كێشەیەك لە بەغداوە دابەشكردنی شایستەی دارایی جووتیاران دواكەوتبوو.