دوای زیاتر لە چوار ساڵ ئەمڕۆ خامنەیی وتاری هەینی پێشکەش دەکات

SNN

دوای زیاتر لە چوار ساڵ بڕیارە ئەمڕۆ خامنەیی رابەری باڵای شۆڕشی ئیسلامیی ئێران بۆ یەکەمجار وتاری هەینی پێشکەش بکات، وتارەکەشی سەبارەت بە هێرشی وڵاتەکەی دەبێت بۆ سەر ئیسرائیل.

ئاژانسی ئیرنای ئێرانی ئەمڕۆ هەینی بڵاویکردووەتەوە، ئەمڕۆ لەگەڵ نوێژی هەینیدا لە تاران ڕێوڕەسمی ڕێزلێنان لە حەسەن نەسڕوڵا، ئەمینداری حیزبوڵای لوبنان و عەباس نیلفروشان، فەرماندەی باڵای سوپای پاسداران بەڕێوەدەچێت کە 27ی ئەیلول لەلایەن ئیسرائیلەوە کوژران.

ئەوەشخراوەتە ڕوو، لە میانی مەراسیمەکەدا و لە کاتی نوێژی هەینیدا عەلی خامنەیی، ڕێبەری باڵای کۆماری ئیسلامی ئێران وتارێك پێشکەش دەکات، پێشبینی دەکرێت ڕێبەری باڵای ئێران لە وتارەکەیدا باس لە دواین پەرەسەندن و گرژییەکانی ئێران و ناوچەکە بکات.

لە ماوەی زیاتر لە چوار ساڵدا، ئەوە یەکەمین جارە خامنەیی وتاری ھەینی پێشکەش بکات، دوایین جار کە وتاری پێشکەش کرد لە مانگی کانونی دووەمی ساڵی 2020دا بوو، چەند رۆژێک پێشتر قاسم سولەیمانی لە فڕۆکەخانەی بەغدا کوژرا.