وەزیری بازرگانی عێراق: بەشى ساڵێک خۆراکمان هەیە

وەزیری بازرگانیی عێراق رایگەیاند، ئاسایشى خۆراک بۆ ماوەى ساڵێکى تەواو گەرەنتی کراوە و مەترسى لەسەر نییە.

لە یەکەمین کۆڕبەندی نیشتمانى بۆ کەرتى تایبەت، کە لەبەغداد بەڕێوەچوو، ئەسیر غەریرى وەزیرى بازرگانی عێراق رایگەیاند، عێراق ساڵانە پێویستی بە زیاتر لە چوار ملیۆن و 500 هەزار تۆن گەنم لەگەڵ 10 بەشەخۆراکی ساڵانە هەیە.

دەشڵێت:”وەزارەتەکەى پلانێکی ستراتیجی سەبارەت بە یاسای ئاسایشی خۆراک داڕشتووە و کۆگاکانی وەزارەتی بازرگانی بڕی پێویستیان خۆراکیان بۆ ماوەى ساڵێک تێدایە و بە تەواوی پێداویستییەكانی سەبەتەی خۆراك مسۆگەر بكرێت”.

دەربارەی پەسەندکردنی یاسای ئاسایشی خۆراک وەزیری بازرگانی عێراق ئاماژەی بەوەشکرد:”پەسەندکردنی یاساکە لەلایەن پەرلەمانەوە رەنگدانەوەی زۆری لەسەر دەستەبەرکردنی کۆگاکردنى خۆراک هەبووە”.

ئەو وتانەی وەزیری بازرگانیی عێراق لە کاتێکدایە، کە مەترسی هەیە ئاڵۆزییەکانی ناوچەکە بگاتە عێراق و گرفت بۆ پێداویستییە خۆراکییەکان دروستبکات.