رێگرییەكانی حكومەتی هەرێم بووەتەهۆی تەوتیننەكردنی مووچەی فەرمانبەران لە بانكە فیدڕاڵییەكان

SNN-عەلی حەمە سەعید

ئەندامێكی لیژنەی دارایی لە ئەنجومەنی نوێنەرانی عێراق ئاماژە بەوەدەكات ئەگەر حكومەتی هەرێم رێگرنەبوایە لە جێبەجێكردنی بڕیارەكەی دادگای فیدراڵی بە كردنەوەی لقی بانكە فیدراڵییەكان لە هەرێمی كوردستان دەمێكبوو بابەتی تەوتینی مووچەی فەرمانبەران كۆتایی هاتبوو گرفتی دواكەوتنی مووچەش وەك ئێستا نەدەبوو.

د.نەرمین مەعروف، ئەندامی لیژنەی دارایی لە ئەنجومەنی نوێنەرانی عیراق بە SNNی ڕاگەیاند: هەر لەیەكەم ساتی دەرچوونی بڕیارەكەی دادگای فیدراڵی لەبارەی تەوتینی مووچەی فەرمانبەران و هەروەها ڕادەستكردنی داهاتی ناوخۆی هەرێم بە حكومەتی عێراق، بەداخەوە كە حكومەتی هەرێم پابەند نەبوو بە جێبەجێكردنی ئەو بڕیاریانە بەوجۆرەی كە لەلایەن دادگای فیدراڵی عێراقییەوە دەركرابوون بەتایبەت لە بارەتی تەوتینی مووچەی فەرمانبەران.

ئاماژەی بەوەشكرد، ئەگەر حكومەتی هەرێم ڕێگر نەبووایە لە جێبەجێكردنی ئەو بڕیارانەی دادگای فیدراڵی بەتایبەت لە بابەتی كردنەوەی لقی بانكە فیدراڵییەكان لە پارێزگاكانی هەرێم بۆ تەوتینكردنی مووچەی فەرمانبەران، ئەوە دەمێك بوو گرفتی ناردن و نەناردنی مووچە چارەسەر بووبوو، بەڵام وەك هەمیشە حكومەتی هەرێم هۆكارە بۆ ئەوەی گرفت بۆ مووچەی فەرمانبەران دروستببێت و پابەند نەبێت بەبڕیارەكانی دادگای فیدراڵییەوە.

ئەو ئەندامەی لیژنەی دارایی لە ئەنجومەنی نوێنەرانی عێراق ئەوەشی خستەڕوو، بڕیارەكەی(بافڵ جەلال تاڵەبانی) سەرۆكی یەكێتی نشتیمانی كوردستان لەبارەی تەوتینكردنی مووچەی فەرمانبەرانی هەرێم لە بانكە فیدراڵیەكان و رەتكردنەوەی پرۆژەی (هەژماری من) هەنگاوێكی دڵخۆشكەرە بۆ ئەوەی لەماوەیەكی كەمدا بتوانین فشارەكانمان زیاتر بكەین لەسەر حكومەتی عێراقی بۆ ئەوەی لقی بانكەكانیان لە پارێزگاكانی هەرێمی كوردستان بكەنەوە و دەستبكەن بە تەوتینكردنی مووچەی فەرمانبەرانی هەرێم.