“پارتی جیاوازی لە نێوان ئەو گوندانە دەكات كە دانیشتووانەكەی پارتی نین و لەژێردەستەڵاتی ئەودان”

SNN-عەلی حەمە سەعید

سەرەڕای ئەوەی كابینەی نۆیەمی حكومەتی هەرێم بە سەرۆكایەتی مەسرور بارزانی بەدرێژایی چوارساڵی ڕابردوو جیاوازی لەنێوان پارێزگاكانی هەولێر و سلێمانی و دهۆك و هەڵەبجە دەكرد بە جێبەجێكردنی پرۆژەی خزمەتگوزاری، لەهەمان كاتیشدا لەژێردەسەڵاتی خۆشیدان هەمان ئەو جیاوازیە بەرامبەر ئەو گوندانە دەكات كە زۆرینەیان یەكێتین و پارتی نین.

بەگوێرەی ئەو زانیارییانەی كە لە دانیشتووانی گوندی ( دولێجان)ی سەر بەقەزای بەردەڕەش بە SNNدراون ئەوەخراوەتەڕوو، لەلایەن وەزارەتی پەروەردەی حكومەتی هەرێم و بەڕێوەبەرایەتی گشتی پەروەردەی دهۆك بڕیاردراوە بە نۆژەنكردنەوەی قوتابخانەی 10 گوندی سنوری قەزای بەردەڕەش، هاوكات سەرەتا نۆژەنكردنەوەی قوتابخانەی گوندی (دولێجان)یش یەكێك بووە لەو قوتابخانانەی كە بڕیاربوو نۆژەنبكرێتەوە.

ئاماژە بەوەشكراوە، بەفەرمانی بەرپرسانی پارتی داوا لە پەروەردەی قەزای بەردەڕەشكراوە كە نۆژەنكردنەوەی قوتابخانەی (دولێجان) ڕابگرن، ئەوەش بەهۆی ئەوەی زۆرینەی دانیشتووانی ئەو گوندە سەر بە یەكێتی نشتیمانی كوردستانن و دەنگ بە لیستی 129ی یەكێتی دەدەن، بۆیە نۆژەنكردنەوەی قوتابخانەی ئەو گوندە دەرهێندراوە لە نۆژەنكردنەوەی قوتابخانەكانی سنورەكە.

ئەو كارەی بەرپرسانی پارتی لە سنوری پارێزگای دهۆك و قەزای بەردەڕەش گرتنەبەری هەمان ئەو سیاسەتەیە كە لەماوەی چوار ساڵی ڕابردووی كابینەی نۆیەمی حكومەتی هەرێم بە سەرۆكایەتی مەسرور بارزانی دژ بە پارێزگاكانی سلێمانی و هەڵەبجە و ئیدارەكانی گەرمیان و ڕاپەڕین گرتبوویە بەر بە جیاوازیكردن لە جێبەجێكردنی پرۆژە خزمەتگوزارییەكان بەراورد بە هەولێر و دهۆك.