لیژنەی ئارامی پارێزگای سلێمانی تایبەت بە هەڵبژاردن راگەیەنراوێکی بڵاوکردەوە

لیژنەی ئارامیی پارێزگای سلێمانی بۆ هەڵبژاردنەكانی پەرلەمانی كوردستان لە راگەیەنراوێکدا ئاشکرایکرد، لە هەر وێستگەیەكی دەنگداندا تەنها لە سەدا پێنجی ئەو هاووڵاتییانەی لەكاتی وەرگرتنی كارتی بایۆمەترییدا پەنجەمۆرەكەیان نەخوێندراوەتەوە، دەتوانن دەنگ بدەن.

ئەمڕۆ پێنجشەممە 10ی تشرینی یەکەم، لیژنەی ئارامیی پارێزگای سلێمانی بۆ هەڵبژاردنەكانی پەرلەمانی كوردستان راگەیەنراوێکی بڵاوکردەوە و تیایدا هاتووە، د.هەڤاڵ ئەبوبەكر پارێزگاری سلێمانی، سەرپەرشتیی كۆبوونەوەی لیژنەی ئارامیی پارێزگای سلێمانی بۆ هەڵبژاردنەكانی پەرلەمانی كوردستانی كردوە و لە كۆبوونەوەكەدا گفتوگۆ لەسەر دوائامادەكارییەكان بۆ هەڵبژاردنەكانی پەرلەمانی كوردستان كراوە ، جەختیش كراوەتەوە لە ئاگاداركردنەوەی هاوڵاتیان  لەسەر چەند خاڵێك بۆ رۆژی دەنگدان  كە گرنگترینیان ئەوەیە ، لە هەر وێستگەیەكی دەنگداندا تەنها لە سەدا پێنجی ئەو هاووڵاتییانەی لەكاتی وەرگرتنی كارتی بایۆمەترییدا پەنجەمۆرەكەیان نەخوێندراوەتەوە، دەتوانن دەنگ بدەن.

جەخت لەسەر ئاگادارکردنەوەی ھاووڵاتییان کرایەوە لەسەر ئەوەی:

1- بردنە ژوورەوەی مۆبایل و ھۆکانی وێنەگرتن بۆ ناو بنکەو وێستگەکانی دەنگدان قەدەغەیە.

2- پێویستە نوێنەری کەناڵە ڕاگەیاندنە ناوخۆیی و نێودەوڵەتییەکان باجی فەرمیی تۆمارکراوی کۆمسیۆنی باڵای سەربەخۆی ھەڵبژاردنەکانی عیراقی فیدراڵیان پێبێت و ڕوماڵ لەو بنکانەدا بکەن کە لەلایەن کۆمسیۆنەوە دیاری کراون.

3- پێویستە چاودێرانی ڕێکخراوە ناوخۆیی و نێودەوڵەتیی و چاودێرانی لایەن و قەوارە بەشداربووەکان باجی فەرمیی تۆمارکراوی کۆمسیۆنیان پێبێت.

4- پێویستە ئەو ھاووڵاتییانەی تائێستا کارتی بایۆمەتری دەنگدانیان وەرنەگرتۆتەوە، لە زووترین کاتدا بچن کارتەکان وەربگرنەوە، بەپێچەوانەوە مافی دەنگدانیان نابێت.

5- دەوامی فەرمیی لە ھەموو خوێندنگا حکومیی و ناحکومیی و تایبەتەکاندا لە ڕۆژی ١٥ تا ٢١/ ١٠/ ٢٠٢٤ دەوەستێت.

6- ھەر ھاووڵاتییەک داوای گواستنەوەی شوێنی بنکەی دەنگدانەکەی کردووەو گواستنەوەکەی بۆکراوەو نەھاتووە کارتە نوێکەی لە کۆمسیۆن وەربگرێت، لە زووترین کاتدا سەردانی نزیکترین بنکەی دەنگدان بکات بۆ وەرگرتنەوەی کارتەکەی.

7- لە ھەر وێستگەیەکی دەنگداندا تەنھا لە سەدا پێنجی ئەو ھاووڵاتییانەی لەکاتی وەرگرتنی کارتی بایۆمەترییدا پەنجەمۆرەکەیان نەخوێندراوەتەوە، دەتوانن دەنگ بدەن.