بۆ وەڵامدانەوەی ئێران، ئەمریکا سیستمی بەرگری تاد لە ئیسرائیل جێگیردەکات
SNN
ئەمریکا بەردەوامە لە هاوکاریکردنی ئیسرائیل، لە دواین هاوکارییاندا ئەمریکا سیستمی بەرگریی تادی لە ئیسرائیل جێگیردەکات، ئەمەش وەک ئامادەکارییەکی پێشوەختەیە بۆ وەڵامدانەوەی ئێران.
رۆژنامەی هارتسی ئیسرائیلی بڵاویکردووەتەوە، بەمنزیکانە واشنتن سیستمی بەرگریی تاد لە ئاسمانی ئیسرائیل جێگیر دەکات ئەمەش بۆ بەرپەرچدانەوەی مووشەی بالیستی دوور مەودایە، لە ئەگەری وەڵامدانەوەی ئێران بۆ سەر ئیسرائیل، لە حاڵەتێکدا ئەگەر ئیسرائیل هێرش بکاتە سەر ئێران.
هاوکات، جێگیرکردنی ئەو سیستمە لەسەر داواکاری ئیسرائیلە بۆ پیشاندانی ھاوپەیمانی بەھێزی ئەو وڵاتە و ئەمریکا.
بەگوێرەی رۆژنامەکە، ئەم هەنگاوەی ئەمریکا بە یەکەم هەنگاو لە جۆری خۆی وەسف کراوە، هەرچەندە ئەمریکا بۆ یەکەمجار لە مانگی ئازاری 2019 سیستەمی THAAD ی لە ئیسرائیل جێگیر کرد، ئەمەش وەک بەشێک لە مەشقەکانی بەرگری هاوبەش.
ئەمە لە کاتێکدایە، پێشتر ئیسرائیل بەڵێنیدابوو بە وەڵامدانەوەی ھێرشە مووشەکییەکەی ئێران، کە سێ بنکەی ئاسمانی لە ئیسرائیل و بنکەیەکی موسادی لە تەلئەبیب بە نزیکەی 200 مووشەک لە سەرەتای ئەم مانگە، کردە ئامانج.
