وردبینی بۆ وێستگەکانی دەنگدان لە سلێمانی دەکرێت

SNN-

ئەمڕۆ کۆمسیۆن وردبینی بۆ دەنگی وێستگە هەژمارنەکراوەکانی سلێمانی دەکات کە ژمارەیان شەش سندوقە.

بڕیارە ئەمڕۆ چوارشەممە، کۆمسیۆنی باڵای سەربەخۆی هەڵبژاردنەکانی عێراق وردبینی بۆ دەنگی وێستگە هەژمارنەکراوەکانی سلێمانی بکات، ئەمەش دوای ئەوەی دوێنێ وردبینی دەنگە هەژمارنەکراوەکانی دهۆک کرا و بە گوێرەی پلانی کۆمسیۆنی باڵای سەربەخۆی هەڵبژاردنەکانی عێراق سبەی لە هەولێر بکرێت.

هەڵشۆ عەبدولفەتاح، چاودێری هەڵبژاردنەکان کە لە ناوەندی وردبینی پارێزگای سلێمانی کۆمسیۆنی هەڵبژاردنەکان ئامادەبوو قسەی بۆ پەیامنێری SNN کرد  و رایگەیاند، شەش سندوق لە سنوری پارێزگای سلێمانی سکاڵایان لەسەر تۆمارکراوە کە جیاوازی هەژمارکردنی دەنگەکانیان بە دەستی و ئەلکترۆنی جیاوازە کە سیانیان لەسەدا 5 زیاترە و دەبێت بە پێی رێکاری کۆمسیۆن بێت دەنگەکان هەژمار بکرێنەوە، بەڵام سیانیان لەسەدا 5 کەمترە دەکرێت تێپەڕاندنیان بۆ بکرێت.

رۆژی دووشەممە 21-10-2024، کۆمسیۆن ئەنجامی بەرایی هەڵبژاردنەکانی هەرێمی کوردستانی راگەیاند و ئاماژەی بەوەکرد دەنگی چەند وێستگەیەک هەژمارنەکراون، ئەنجامەکە هی رێژەى 99.63%ی وێستگەکانی دەنگدان بوو لە هەرێمی کوردستان.

پڕۆسەی هەژماری دەستی ئەو وێستگانەی هەژمار نەکراون لە سێ رۆژدا تەواو دەبێت کە 26 وێستگەن، دوێنێ لە دهۆک دەستیپێکرد و ئەمڕۆش لەسلێمانی دەبێت..