هاتنی وەرزی سەرما نرخی مریشكی زیندوو بەرز دەكاتەوە

SNN-عەلی حەمە سەعید

سەرۆكی كۆمەڵەی كێڵگە پەلەوەرییەكان ئاماژە بەوەدەكات بەهۆی هاتنی وەرزی سەرما خاوەن كێلگە پەلەوەرییەكان دەبێت غاز و سوتەمەنی بەكار بهێنن بۆ پاراستنی بەرهەمی مریشكەكانیان ئەوەش خەرجی و تێچووی بەرهەمهێنانی مریشك زیاتر دەكات و وادەكات نرخەكەی لەبازاڕیش زیاتر ببێت كە لە ئێستادا نرخی یەك كیلۆ مریشك لە كێڵگە پەلەوەرییەكان بە دوو هەزار و 400 دینارە.

نازم عەبدوڵا، سەرۆكی كۆمەڵەی كێڵگە پەلەوەرییەكان بە SNNی گەیاند: ساڵانە لەگەڵ هاتنی وەرزی سەرما و نزمبوونەوەی پلەكانی گەرما، خاوەن كێڵگە پەلەوەریەكان دەبێت پەنا بۆ كڕینی سوتەمەنی و غاز ببەن بۆ ئەوەی پلەی گەرمای ناو هۆڵەكانی بەخێوكردنی جوجك ڕابگرن ئەوەش وادەكات خەرجی و تێچووی زیاتر لەسەر خاوەن كێڵگەكان زیاد بكات.

ئاماژەی بەوەشكرد، لە ئێستادا نرخی یەك كیلۆ مریشك لە كێڵگە پەلەوەرییەكان زیاتر لە دوو هەزار و 400 دینار لەسەر خاوەنی كێڵگە پەلەوەرییەكان دەكەوێت، هاوكات بە كڕینی غاز و گاز و سوتەمەنی ئەو كاتیش نرخی جوجك و عەلەفیش زیاد دەكات و دواجار نرخی مریشكیش لە بازاڕەكان زیاد دەكات ئەگەر حكومەت هاوكاری خاوەن كێڵگەكان نەكات لەدابینكردنی سوتەمەنی.

سەرۆكی كۆمەڵەی كێڵگە پەلەوەریەكان ئەوەشی خستەڕوو، ئیمە زۆرمان بە حكومەت وتووە كە ئەگەر هاوكاری بكرێین و پێداویستییەكانمان بۆ دابین بكرێت نرخی مریشك جێگیر دەبێت و كەمتر لەسەر هاووڵاتیان دەكەوێت، بەڵام حكومەت ئامادە نییە هیچ وەڵامێكمان بداتەوە و تەنانەت زۆربەی كاتیش گرفتمان بۆ دروستدەكات لە ساغكردنەوەی بەرهەمەكانمان.