زستان و لافاو و قوربانی، مۆتەکە نەبڕاوەکەی شاری هەولێر

SNN-عەلی حەمە سەعید

ساڵانە لەگەڵ هاتنی وەرزی بارانبارین لە چەندین گەرەكی شاری هەولێر لافاو دروست دەبێت و بەهۆیەوە زیانی گیانی و مادی بەدوای خۆیدا دەهێنێت، بۆ ئەمساڵیش كە بەگوێرەی پێشبینی كەشناسان بری باران بارین زۆر دەبێت هەولێرییەكان ترسیان لەوە هەیە كە جارێكی دیكە لافاو لەگەڕەكەكانیان دروست ببێتەوە و زیانیان پێبگات.

خالید سادق، یەكێك لە هاووڵاتیانی دانیشتووی گەڕەكی زیلان بە SNNی ڕاگەیاند: بەهۆی پشتگوێخستنی ئیدارەی شاری هەولێر بە دروستكردنی پرۆژەی ئاوەڕۆ و نەبوونی ئاوەڕۆ و ڕێڕەوی ئاوی پێویست لە گەڕەكەكەمان و دەیان گەڕەكی دیكەی هەولێر ساڵانە لەگەڵ هەر بارانبارینێكی كەمدا هاوشێوەی مەلەوانگەیەك كۆلانەكان پڕدەبن لە ئاو و زیانێكی زۆر دوای خۆی جێدەهێڵێت، بۆیە هەر لە ئێستاوە ترسمان لە درویستبوونی لافاو لا دروستبووە.

ئاماژەی بەوەشكرد، لەگەڵ هاتنی وەرزی باران بارین ترسی هاووڵاتیانی گەڕەكە جیاوازەكانی شاری هەولێر ڕۆژ بە ڕۆژ زیاتر دەبێت، چونكە لەگەڵ هاتنی وەرزی زستان بەهۆی بێپلانی حكومەتی كاربەڕێكەرەوە لافاو روو لە گەڕەك و بازاڕەكانی هەولێر دەكات و ئیدارەی شارەكەش نایەن بەدەم چارەسەركردنی گرفتەكانی هاووڵاتیانەوە و هیچ پلانێكی درێژخایەنی نییە بۆ نەهێشتنی مەترسی دروستبوونی لافاو لە هەولێر.

وتەكانی ئەو هاووڵاتییەی شاری هەولێر لەكاتێكدایە كە ساڵی ڕابردوو بەهۆی باران بارینەوە چەندین جار لە دەیان گەڕەكی هەولێر و ناوبازاڕی هەولێر لافاو دروستبوو بەهۆی ئەو لافاوانەوە چەند هاووڵاتییەك گیانیان لەدەستدا و زیانێكی زۆرمادیشییان بەدوای خۆیدا هێنا.