عەلی خامنەیی: هێشتا ئیسرائیل هێز و توانای ئێران ناناسێت

رێبەری باڵای کۆماری ئیسلامی ئێران، لەبارەی هێرشەکانی ئەم دواییەی ئیسرائیل بۆ سەر ئێران رایگەیاندووە، ئیسرائیل بەو کارەی هەڵەی کردووە و هێز و توانای ئێران ناناسێت هەر بۆیە دەبێت بەرپرسانی وڵات وەڵامی هێرشەکەی ئیسرائیل بدەنەوە.

ئەمڕۆ یەکشەممە 27ی تشرینی یەکەم، عەلی خامنەیی، رێبەری کۆماری ئیسلامی ئێران سەبارەت بە دواین هێرشی ئیسرائیل بۆ سەر خاکەکەی راگەیەنراوێکی بڵاوکردووەتەوە و رایگەیاندووە، “دوو شەو لەمەوبەر رژێمی زایۆنی جووڵەیەکی هەڵەی کرد، پێویستە کارێكی وا بکەین رژێمی زایۆنی لە هێز و سوربوونی گەلی ئێران تێبگات.”

ئاماژەی بەوەکردووە، “ئه‌وان ئێران ناناسن، هێشتا به‌ دروستی له‌ هێز و توانای ئێران تێنه‌گه‌یشتوون، هەر بۆیە دەبێت بەرپرسانی ئێران هێزی خۆیان پیشانی ئیسرائیل بدەن.”

لە بەرەبەیانی ڕۆژی شەممە، 26ـی ئۆکتۆبەری 2024، ئیسرائیل هێرشی ئاسمانی بۆ سەر چەند شوێنێکی ئێران دەستپێکرد، بەهۆیەوە دوو سەربازی ئەو وڵاتە کوژران.