ئەمڕۆ مامۆستایانی گرێبەست مووچەی مانگی 9 وەردەگرن
SNN
بەگوێرەی نووسراوی ئەنجومەنی وەزیران، دەبوو مووچەی مامۆستایانی گرێبەست لەگەڵ مامۆستایانی میلاکی وەزارەتی پەروەردە رۆژی سێشەممەی رابردوو دابەشکرایە، بەڵام دواخرا و ئەمڕۆ مووچەی مانگی 9 وەردەگرن.
وەزارەتی دارایی و ئابووری حکوومەتی هەرێمی کوردستان بڵاویکردەوە، ئەمڕۆ دووشەممە 28ـی تشرینی یەکەم، مووچەی مانگی ئەیلوولی مامۆستایانی گرێبەست لەسەرتاسەری هەرێمی کوردستان دابەش دەکرێت.
لەوبارەیەوە، عەلی رەئووف مستەفا، نوێنەری گشتی مامۆستایانی گرێبەست رایگەیاندووە، بەگوێرەی راگەیەنراوەکەی وەزارەتی دارایی هەرێم ئەمڕۆ یەکەم مووچەی مامۆستایانی گرێبەست بۆ مانگی 9 لە 37 پەروەردە دابەشدەکرێت.
ئاماژەی بەوەکردووە، بەگوێرەی نووسراوی ئەنجومەنی وەزیران، دەبوو مووچەی مامۆستایانی گرێبەست لەگەڵ مامۆستایانی میلاکی وەزارەتی پەروەردە دابەشبکرێت، رۆژی سێشەممەی رابردوو مامۆستایانی میلاک دابەشکرا، بەڵام مامۆستایانی گرێبەست دابەشنەکرا.
وتوویەتی، “بۆ مانگەکانی داهاتوو هەوڵی تەواومان داوە مووچەی مامۆستایانی گرێبەست لەگەڵ مووچەی مووچەخۆران دابەشبکرێت بەتایبەت لەگەڵ وەزارەتی پەروەردە.”
مامۆستایانی گرێبەست ئەوانەی بڕوانامەى دیبلۆمیان هەیە مووچەکانیان 400 هەزار دینار و ئەوانەى بڕوانامەى بەکالۆریۆسیان هەیە 500 هەزار دینارە و خەرجیى مانگانەشیان 18 ملیار دینارە.
