عێراق بە فەڕمی یاداشتنامەیەکی پێشکەشی ئەنجوومەنی ئاسایشی نێودەوڵەتی کرد
SNN
وتەبێژی حکومەتی عێراق لە یاداشتنامەیەکدا کە ئاڕاستەی ئەمینداری گشتیی نەتەوەیەکگرتووەکان و ئەنجوومەنی ئاسایشی نێودەوڵەتی کردووە، داوا دەکات ئاسمانی وڵاتەکەی بۆ هێرشکردنە سەر وڵاتانی دراوسێ بەکارنەهێنرێت.
ئەمڕۆ دووشەممە 28ی تشرینی یەکەم، باسم عەوادی، وتەبێژی حکومەتی عێراق لە یاداشتنامەکەیدا سەرکۆنەی ئەو پێشێلکارییانە دەکات کە قەوارەی زایۆنی لە ئاسمانی عێراقدا ئەنجامیداوە بۆ هێرشکردنەسەر کۆماری ئیسلامیی ئێران لە شەوی 26ـی تشرینی یەکەمی 2024. ”
ئاماژە بەوەکراوە، محەمەد شیاع سودانی سەرۆکوەزیرانی عێراق وەزارەتی دەرەوەی راسپاردووە بۆ پەیوەندیکردن بە لایەنی ئەمریکی لەبارەی ئەو “پێشێلکارییەوە”، بۆ ئەوەی ئەمریکا پابەندییەکانی خۆی بەرامبەر بە سەروەری و ئاسایشی عێراق لە بڕگەکانی رێککەوتنی چوارچێوەی ستراتیژی جێبەجێبکات.
هاوکات، حکومەتی عێراقی پابەندیی خۆی لەبارەی سەروەری و سەربەخۆیی عێراق دووپاتدەکاتەوە و کار بۆ بەرەنگاربوونەوەی پێشێلکارییەکان دەکات.
