هەژماری من پڕۆژەیەكی شەخسییەو تەواو پێچەوانەی بڕیارەكەی دادگای فیدراڵییە
سۆزان مەنسور، وتەبێژی فراكسیۆنی یەكێتی لە ئەنجوومەنی نوێنەرانی عێراق | فۆتۆ: Rudaw
SNN-عەلی حەمە سەعید
وتەبێژی فراكسیۆنی یەكێتی لە پەرلەمانی عێراق ئاماژە بەوەدەكات پرۆژەی هەژماری من پڕۆژەیەكی شەخسییەو تەواو پێچەوانەی بڕیارەكەی دادگای فیدراڵییە، بۆیە ئێمە نامانەوێت كارێك بكرێت پێچەوانەی بڕیارەكەی دادگای فیدراڵی بێت و لە داهاتوودا گرفت بۆ مووچەی فەرمانبەرانی هەرێم دروست ببێت، بۆیە هەموو هەوڵێكمان بۆ جێبەجێكردنی تەوتینە لە بانكە فیرداڵییەكان.
سۆزان مەنسور، وتەبێژی فراكسیۆنی یەكێتی لە ئەنجومەنی نوێنەرانی عێراق بە SNNی ڕاگەیاند: بەگوێرەی ئەو ڕێككەوتنەی كە كراوە دەبێت تاكۆتایی ساڵ سەرجەم مووچە خۆرانی هەرێم لەیەكێك لەبانكە حكومییەكانی عیراق تەوتینیان بۆبكرێتەوە، بۆیە ئەگەر بەخێرایی ئەو كارە نەكرێت ئەوا لەدوای سەری ساڵەوە جارێکی دیكە گرفتی دواكەوتنی مووچە سەر هەڵدەداتەوە وگرفت بۆ مووچەی فەرمانبەران دروست دەبێت.
ئاماژەی بەوەشكرد، ئێمە بەڵێنمان بە هاووڵاتیان و فەرمانبەران داوە كە بەرگریكاربین لە مووچەكانیان و نەهیڵین گرفت بۆ مووچەی فەرمانبەران دروست ببێت، بۆیە دەبێت لە ڕێگەی تەوتین لە بانكە فیدراڵییەكان مووچەی فەرمانبەران گەرەنتی بكرێت، چونكە پرۆژەی هەژماری من پرۆژەیەكی سەخسییە و پێچەوانەی بڕیارەكەی دادگای فیدراڵییە.
وتەبێژەكەی فراكسیۆنی یەكێتی لە پەرلەمانی عێراق ئەوەشی خستەڕوو، وەك ئەركی سەرشانمان و لە چوارچێوەی هەوڵەكانمان بۆ تەوتینكردنی مووچەی فەرمانبەران، لە پەرلەمانی عێراقەوە دەستمان كردووە بە كۆكردنەوەی واژوو بۆ ئەوەی لەڕێگای پەرلەمانەوە سەرۆكوەزیرانی عێراق پابەند بكرێت بە جێبەجێكردنی بڕیارەكەی دادگای فیدراڵی و گەشبینین كە بتوانین تا كۆتایی ئەمساڵ ئامانجەكەمان بەدەست بهێنین.
