مووچە تەوتین بكرێت كێشەی پلەبەرزكردنەوەی فەرمانبەران چارەسەردەبێت
تەوتین، رەشید، رافیدەین
SNN-عەلی حەمەسەعید
ئەندامێكی ئەنجومەنی نوێنەرانی عێراق ئاماژە بەوەدەكات ئەگەر مووچەی فەرمانبەرانی هەرێم بەگوێرەی بڕیارەكای دادگای فیدراڵی عێراق تەوتین بكرێت، ئەوا لە قۆناغی داهاتوودا كێشەی پلەبەرزكردنەوەی فەرمانبەران چارەسەردەبێت.
سروە محەمەد، ئەندامی ئەنجومەنی نوێنەرانی عێراق لە فراكسیۆنی یەكێتی بە SNNی رایگەیاند: وەك فراكسیۆنی یەكێتی لە پەرلەمانی عێراقەوە هەوڵەكانمان چڕكردووەتەوە بۆ ئەوەی تەوتینی مووچەی فەرمانبەرانی هەرێم بكرێت وەك ئەوەی لە بڕیارەكەی دادگای فیدراڵی عێراق ئاماژەی پێكراوە، چونكە پێمان وایە بۆ گەرەنتیكردنی مووچە، پێویستە مووچەی مووچەخۆرانی هەرێمی كوردستان تەوتین بكرێت.
ئاماژەی بەوەشكرد، ئەگەر بڕیارەكەی دادگای فیدراڵی وەك خۆی جێبەجێبكرێت ئەوا ئەو كێشە و گرفتانەی كەپێشتر هەبوون لەبارەی دواكەوتنی مووچەی فەرمانبەرانی هەرێم جارێكی دیكە سەرهەڵنادەنەوە، هاوكات ئەگەر مووچە تەوتین بكرێت كێشەی پلەبەرزكردنەوەی فەرمانبەران چارەسەردەبێت و هاوشێوەی مووچەخۆرانی عێراق پلەبەرزكردنەوە بۆ فەرمانبەران دەستپێدەكاتەوە.
هەوڵەكانی فراكسیۆنی یەكێتیی نیشتمانیی كوردستان لە بەغدا بۆ تەوتینكردنی مووچەی مووچەخۆرانی هەرێم بەردەوامە و لە چەند رۆژی رابردووشدا لەگەڵ بەرێوەبەری بانكی رەشید كۆبوونەتەوە و مۆڵەتیان وەرگرتووە كە لقەكانی ئەو بانكە لە سلێمانی بكەنەوە و تەوتینی مووچەی فەرمانبەران دەستپێبكات.
