لەگەڵ هاتنی شەپۆلی بارانبارین مەترسی دروستبوونی لافاو لە هەولێر هەیە

SNN-عەلی حەمە سەعید
ساڵانە لەگەڵ هاتنی وەرزی بارانبارین لە چەندین گەرەكی شاری هەولێر لافاو دروست دەبێت و بەهۆیەوە زیانی گیانی و مادی بەدوای خۆیدا دەهێنێت، بۆ ئەمساڵیش كە بەگوێرەی پێشبینی كەشناسان بری باران بارین زۆر دەبێت و خەڵکی هەولێریش ترسیان لەوە هەیە كە جارێكی دیكە لافاو لەگەڕەكەكانیان دروست ببێتەوە و زیانیان پێبگات.

خالید سادق، یەكێك لەهاووڵاتیانی دانیشتووی گەڕەكی زیلان بە SNNی ڕاگەیاند: بەهۆی پشتگوێخستنی ئیدارەی شاری هەولێر بە دروستكردنی پرۆژەی ئاوەڕۆ و نەبوونی ئاوەڕۆ و ڕێڕەوی ئاوی پێویست لە گەڕەكەكەمان و دەیان گەڕەكی دیكەی هەولێر ساڵانە لەگەڵ هەر بارانبارینێكی كەمدا هاوشێوەی مەلەوانگەیەك كۆلانەكان پڕ دەبن لە ئاو و زیانێكی زۆر دوای خۆی جێدەهێڵێت، بۆیە هەر لە ئێستاوە ترسمان لەدرویستبوونی لافاو لا دروستبووە.

ئاماژەی بەوەشكرد، لەگەڵ هاتنی وەرزی باران بارین ترسی هاوڵاتیانی گەڕەكە جیاوازەكانی شاری هەولێر ڕۆژ بە ڕۆژ زیاتر دەبێت، چونكە لەگەڵ هاتنی وەرزی زستان بەهۆی بێ پلانی حكومەتەوە لافاو روو لە گەڕەك و بازاڕەكانی هەولێر دەكات و ئیدارەی شارەكەش نایەن بەدەم چارەسەركردنی گرفتەكانی هاووڵاتیانەوە و هیچ پلانێكی درێژخایەنی نییە بۆ نەهێشتنی مەترسی دروستبوونی لافاو لە هەولێر.

وتەكانی ئەو هاووڵاتییەی شاری هەولێر لەكاتێكدایە كە بەگوێرەی پێشبینییە كەشناسییەكان لە ئەمشەوەوە شەپۆلێكی باران بارین هەرێمی كوردستان دەگرێتەوە و هاووڵاتیانی هەولێریش ترسیان لە دروستبوونی لافاو هەیە لە گەڕەك و كۆڵانەكانیاندا.