تائێستا سێ تانە لە ئەنجامی هەڵبژاردنەكان دراوە و سبەینێ كۆتایی بە تانەلێدان دێت
جومانە غەلای، وتەبێژی كۆمسیۆنی باڵای سەربەخۆی هەڵبژاردنەكانی عێراق | فۆتۆ: كۆمسیۆن
SNN-عەلی حەمە سەعید
وتەبێژی كۆمیسیۆنی باڵای سەربەخۆی هەڵبژاردنەكانی عێراق ئاماژە بەوەدەكات، تا ئەمڕۆ سێ تانە لە ئەنجامی هەڵبژاردنەكانی پەرلەمانی كوردستان تۆماركراوە و سبەینێ یەكشەممەش كۆتایی بە تانەلێدان دێت لە ئەنجامەكان، هاوكات ئەنجومەنی كۆمیسیارانیش بریار لەسەر تانەكان دەدات.
جومانە غەلای وتەبێژی كۆمیسیۆنی باڵای سەر بەخۆی هەڵبژاردنەكانی عێراق بە SNNی ڕاگەیاند: دوای ئەوەی لە سێ ڕۆژی ڕابردوودا ئەنجامی كۆتایی هەڵبژاردنەكانی خولی شەشەمی پەرلەمانی كوردستان ڕاگەیەندرا، لە ڕۆژی پێنجشەممەوە دەرگای تانەدان لە ئەنجامەكان كراوەتەوە بۆ ئەوەی كاندیدەكان و لایەنە سیاسییەكان تانە لە ئەنجامەكان بدەن ئەگەر ئەنجامەكانیان بەدڵ نییە.
ئاماژەی بەوەشكرد، تا ئەمڕۆ شەممە 2/11/2024 تەنها سێ تانە تۆماركراون، بەجۆرێك دوو تانە لە ئۆفیسی دهۆكی كۆمیسیۆن و تانەیەكیش لە ئۆفیسی سلێمانی كۆمیسیۆن تۆماركراوە و لە ئۆفیسی هەولێر هیچ تانەیەك تۆمار نەكراوە و هاوكات وەرگرتنی تانەكانیش تا سبەی یەكشەممە بەردەوامی دەبێت، پاشان ئەنجومەنی كۆمیسیاران بڕیار لەسەر تانەكان دەدات.
وتەكانی وتەبێژی كۆمیسیۆنی باڵای سەر بەخۆی هەڵبژاردنەكانی عێراق لەكاتێكدایە كە ڕۆژی 20ی مانگی ڕابردوو پرۆسەی هەڵبژاردنی گشتی بۆ خولی شەشەمی پەرلەمان بەڕێوەچوو، هاوكات ڕۆژی چوارشەممەی ڕأبردووش كۆمیسیۆن ئەنجامی كۆتایی پرۆسەكەی ڕاگەیاند و بۆماوەی سێ ڕۆژیش دەرگای تانەدا كراوەتەوە لە ئەنجامەكان و سبەینێ یەكشەممە ئەو وادەیە كۆتایی پێدێت.
