لە عێراق دەستكرا بە دابەشكردنی مووچەیی مانگی 11 لە هەرێمش تازە لیست ڕەوانە دەكرێت

SNN-عەلی حەمە سەعید

وەزارەتی دارایی عێراق دەستیكردووە بە دابەشكردنی مووچەی مانگی 11ی خانەنشینانی شارستانی و سەربازی، بەڵام وەزارەتی دارایی هەرێم ئەمڕۆ وەك هەواڵێكی بەپەلە ناردنی لیستی مووچەی بۆ بەغدا بلاوكردەوە، شارەزایەكی بواری دارایش ئاشكرایدەكات تا ئێستاش دیار نییە ئەو لیستە پەسەند دەكرێت یاخود نا و دیاریش نییە كەی پارە ڕەوانەی هەرێم دەكرێت.

ئەمڕۆ یەك شەممە وەزارەتی دارایی عێراق بڵاویكردەوە كە دەستیان كردووە بە دابەشكردنی پارەی مووچەی مانگی 11ی خانەنشینانی سەربا و خانەنشینانی شارستانی عێراق و لە ڕۆژانی داهاتووش دابەشكردنی مووچەی وەزارەتەكانی دیكەی عێراق دەستپێدەكات.

هەر ئەمڕۆش وەزارەتی دارایی و ئابوری هەرێم لە راگەیەندراوێكدا ئەوەی بڵاوكردەوە كە ئەمڕۆ یەك شەممە 3ی 11 لیستی مووچەی مانگی تشرینی یەكەمی فەرمانبەران و مووچەخۆرانی هەرێمی كوردستان لەلایەن نوێنەری وەزارەتی دارایی و ئابووری هەرێمی كوردستانەوە ڕادەستی بەڕێوبەرایەتی گشتی ژمێریاری لەوەزارەتی دارایی حكومەتی فیدراڵ كرا.

عوسمان محەمەد، شارەزا لەكاروباری دارایی ئەوەی بە SNNڕاگەیاند: كە گرفتی دواكەوتنی مووچەی فەرمانبەران تەنها بە تەوتین چارەسەردەبێت، چونكە دوای تێپەڕبوونی یەك مانگ تازە بەتازە وەزارەتی دارایی لیست ڕەوانە دەكات و دیاریش نییە ئەو لیستە لەلایەن عێراقەوە پەسەند دەكرێت یاخود ڕەوانەی هەرێم دەكرێتەوە، ئەوە سەرەڕای ئەوەی نازاندرێت كەی پارە ڕەوانەدەكرێت، بۆیە ئەگەر تەوتین بكرێت سەرجەم ئەو گرفتانە چارەسەر دەبن و مووچە ڕاستەوخۆ دەچێتە سەر ژمارە حسابی فەرمانبەرانی هەرێم.