کاروان یاروەیس لەبارەی هاتنی بانکی تی بی ئای بۆ ناو هەژماری من روونکردنەوە دەدات

SNN

کاروان یاروەیس رایدەگەیەنێت، زیاتر لە شەش مانگە بانکی تی بی ئای هاتووەتە ناو هەژماری منەوە، دەڵێت “لام سەیرە دوای ئەو ماوە ئێستا باسی ئەوە دەکرێت.”

کاروان یاروەیس، ئەندامی ئەنجوومەنی نوێنەرانی عێراق رایدەگەیەنێت، حەوت مانگ لەمەوبەر بانکی عێراقی بازرگانی TBI لەناو فۆرمی پرۆژەی هەژماری من زیادکرا، دەڵێت “من خۆم پێنج مانگ لەمەوبەر قسەم لەگەڵ بەرێوەبەری گشتی بانکەکە کردووە بەواتسئاب چ بەتەلەفۆن و چ بەنامە.”

ئاماژەی بەوەکردووە، “سەیرم لێدێت لەم ئانوساتەدا، کە هەوڵەکان بۆ جێبەجێ کردنی بڕیاری دادگای باڵای فیدرالی لەبارەی تەوتنی مووچەی هەرێم چڕبۆتەوە، بانکی TBI، ئەمرۆ ئەوەی راگەیاندووە چوونەتە ناو پرۆژەی هەژماری من، لەوساوە بۆ ئێستا ئەوە نیو ساڵ زیاترە لەناو هەژماری منە، جگە لەچەند سەد هەژمارێکی بانکی هیچی تریان نەکردوە.”.

ئەو ئەندامەی ئەنجوومەنی نوێنەرانی عێراق ئاشکرایدەکات، تائێستا رێوشوێنی کردنەوەی لقی نوێ لە پارێزگای هەڵەبجە و ئیدارەکانی گەرمیان و راپەرین و و سۆران و زاخۆ تاد… و دانانی ئامێری ئای تی ئێم نەگرتۆتەبەر.

روونیکردووەتەوە، “لەفۆرمی هەژماری من، مووچەخۆر دەتوانێت لەخانەی هەڵبژاردنی بانکەکان لە خانەی سەرەکی TBI هەڵبژێرێت، بەڵام لەخانەی یەدەک ناتوانێت هەر TBI هەڵبژێرێت ناچارە بانکێکی ئەهلی هەڵبژێرێت چونکە تاکە بانکی فیدرالی و حکومی تەنها TBI.”

جەختیکردووەتەوە، پێویستە هەموولایەک ئەو راستیە بزانن، کە هاتنی TBI بۆ ناو هەژماری من، نە بەمانای تەوتین دێت، نە بەمانای جێبەجێکردنی بڕیاری دادگای فیدرالی دێت، نە وەڵامدانەوەی داواکاری مووچەخۆرانی هەرێمە.

ئەمەش دوای ئەوەی دێت، بانکی تی بی ئای دوێنێ یەکشەممە 3ی تشرینی دووەم لە راگەیەنراوێکدا ئاشکرایکردبوو، کە چوونەتە ناو پڕۆژەی هەژماری منەوە.